Иранда кәсіпкерлер ереуілге шықты

Халықаралық ақпарат агенттіктерінің жазуынша, наразылықтың негізгі себебі – ұлттық валютаның күрт құнсыздануы, инфляцияның өсуі және сауда-саттықтағы белгісіздік. Соңғы күндері иран риалының бағамы рекордтық төмен деңгейге түскен, бұл кәсіпкерлер мен қарапайым тұрғындардың ашу-ызасын күшейткен .

Теһрандағы базарлар жабылды

Наразылық Теһранның орталық базарларында басталды. Саудагерлер жаппай дүкендерін жауып, ереуілге шыққан. AP News агенттігінің хабарлауынша, бұл Иранда дәстүрлі түрде билікке қысым көрсетудің ең әсерлі формаларының бірі саналады, өйткені базар қауымы ел экономикасында маңызды рөл атқарады .

Алғашқы күні акциялар негізінен бейбіт сипатта өткенімен, екінші күні жағдай күрделене түсті.

29 желтоқсанда наразылық Хамадан, Исфахан, Шираз және басқа да бірқатар қалаларда тіркелді. Iran International мәліметінше, Хамадан мен Теһранның кей аудандарында демонстранттар мен арнайы жасақ арасында қақтығыстар болған, қауіпсіздік күштері көзден жас ағызатын газ қолданған.

Әлеуметтік желілерде тараған бейнежазбаларда полиция мен наразылыққа шыққан азаматтардың бетпе-бет келген сәттері көрінеді. Ресми билік қаза тапқандар немесе көптеп ұсталғандар туралы ақпарат таратқан жоқ.

Экономикалық наразылық саяси реңк ала бастады

Сарапшылардың айтуынша, бастапқыда таза экономикалық сипатта басталған бұл ереуіл біртіндеп саяси ұрандарға да ұласуы мүмкін. AP News жазуынша, кейбір өңірлерде билікке қарсы сөздер айтылып, әлеуметтік әділетсіздік мәселесі көтерілген.