Иранда наразылықты қолдаған 25 спортшы мен кино өкіліне қарсы іс қозғалды

 Бұл туралы бірқатар шетелдік бұқаралық ақпарат құралдары хабарлады.

Мәліметтерге сәйкес, тізімге кәсіби спортшылар, танымал актерлер, режиссерлер мен мәдениет саласының өкілдері кірген. Оларға «қоғамдық тәртіпке қарсы әрекеттерді қолдау», «билікке қарсы үгіт-насихат жүргізу» және «қоғамдық тұрақсыздықты күшейту» баптары бойынша айып тағылып отыр.

Иран прокуратурасы бұл тұлғалардың әлеуметтік желілердегі жазбалары, ашық мәлімдемелері мен наразылықтарды қолдаған үндеулерін тергеуге негіз ретінде алған. Кей деректерге қарағанда, айыпталушылардың бір бөлігіне елден шығуға тыйым салынған, сондай-ақ мүліктерін тәркілеу мәселесі де қарастырылып жатыр.

Құқық қорғау ұйымдары бұл қадамды биліктің танымал тұлғалар арқылы қоғамға қысым жасау әрекеті деп бағалап отыр. Сарапшылардың айтуынша, спортшылар мен өнер адамдары Иранда халық арасында үлкен ықпалға ие болғандықтан, билік олардың белсенді позициясын ерекше қауіп ретінде қабылдайды.

Айта кетейік, соңғы апталарда Иранда әлеуметтік және саяси сипаттағы наразылықтар күшейіп, билік тарапынан қатаң шаралар қабылдана бастады. Бұған дейін де ондаған белсенді, журналист және қоғам қайраткері ұсталып, интернетке шектеу қойылғаны хабарланған болатын.