Израиль әскерін Газа секторында буферлік аймаққа алып шыға бастады

Израиль үкіметі бейсенбі күні АҚШ президенті Дональд Трамптың делдалдығымен қабылданған бейбіт келісім жобасын мақұлдаған болатын. Құжатқа сәйкес, Израиль әскері жаңа позицияларға орналастырылғаннан кейін ХАМАС 72 сағат ішінде кепілге алынған израильдіктерді босатуы тиіс.

ЦАХАЛ Оңтүстік қолбасшылығының мәлімдемесінде:

«Біздің әскери бөлімдер белгіленген позициялар аймағында орналасқан және кез келген тікелей қауіптің алдын алуды жалғастырады», — делінген.

 Әскердің нақты қай бағыттан шегініп жатқаны әзірге белгісіз

AFP агенттігі Газа азаматтық қорғаныс қызметіндегі дереккөзге сілтеме жасап, әскери техникалардың Хан-Юнис аудандары мен Газа қаласының солтүстік-батыс шет аймақтарынан шығарылып жатқанын хабарлады.

Қазіргі уақытта мыңдаған тұрғын өз үйлеріне оралуға рұқсат берілетін сәтті күтіп отыр. Израиль БАҚ-тарының мәліметінше, түннен бері Ал-Рашид жолы бойында күтіп тұрған жүздеген палестиналықтар солтүстік бағытқа қарай қозғала бастаған.

Израиль армиясы ескерту жасады

Израиль әскері Газа тұрғындарын тек рұқсат етілген бағыттармен ғана қозғалуға шақырып, алдағы күндері Израиль күштері орналасқан аймақтарға жақындамау туралы ескерту жасады.

«Келісім бойынша ЦАХАЛ бөлімдері Газа секторының кейбір бөліктерінде қалады. Бұл аймақтарға жақындамаңыздар — бұл сіздің өміріңізге қауіп төндіреді», — делінген Израиль әскерінің араб тіліндегі үндеуінде.

Израиль армиясының араб тілінде сөйлейтін ресми өкілі, полковник Авичай Адраи де:

«Израиль аумағына және буферлік аймаққа жақындауға тыйым салынады. Бұл өте қауіпті», — деді.

 Буферлік аймақ пен бақылаудағы аумақтар

Қазіргі таңда Израиль әскері Газа секторы аумағының шамамен 53 пайызын бақылауда ұстап отыр. Бұл аймақтың көп бөлігі қала шегінен тыс орналасқан.

Бақылаудағы аумақтарға мыналар кіреді:

• Газа секторының бүкіл шекара бойындағы буферлік аймақ,

• Мысырмен шекарадағы Филадельфия дәлізі,

• Солтүстіктегі Бейт-Ханун мен Бейт-Лахия,

• Газа қаласының шығыс шетіндегі таулы аудандар,

• Оңтүстіктегі Рафах пен Хан-Юнис аудандарының үлкен бөлігі.

Жұма күні таңертеңнен бастап Израиль мен Газа шекарасы үстінде түтін байқалған.
БАҚ мәліметінше, сол күні Хан-Юнисті артиллериядан ату және Нецарим дәлізі маңында атыс дауыстары естілген.