Жазылу
Израиль ХАМАС-ты бітімді бұзды деп айыптады
Израиль қорғаныс күштері (ЦАХАЛ) ХАМАС қозғалысын атысты тоқтату келісімін бұзды деп мәлімдеп, Газаның оңтүстігіндегі Рафах ауданында ұйым инфрақұрылымына әуе соққылары жасалғанын растады.
Бұл туралы 19 қазан, жексенбі күні Израиль армиясының ресми Telegram-арнасында хабарланды.
Оқиғаның мәні
Израиль тарапының мәліметінше, жексенбі күні таңертең ХАМАС содырлары Рафах маңында атысты тоқтату шарттарына қарамастан ЦАХАЛ бөлімшелеріне қарсы танкке қарсы зымырандар атқан.
«Террористер біздің әскерлерге шабуыл жасады. Біз қауіптің көзін жою мақсатында әуе және артиллериялық соққылармен жауап бердік. Бірнеше бомба мен әскери нысан жойылды», — делінген армияның ресми хабарламасында.
ЦАХАЛ мұны «атысты тоқтату келісімін өрескел бұзу» деп атап, Израильдің «қатаң шаралар қолданатынын» мәлімдеді.
Куәгерлердің сөзі мен ресми мәліметтер
AFP агенттігі таратқан дерекке сай, Рафах қаласының Израиль бақылауындағы бөлігінде атыс пен қақтығыс басталып, артынша екі әуе шабуылы жасалған. Израильдік ресми тұлға AFP-ке берген түсініктемесінде:
«ЦАХАЛ сарбаздарына граната және ХАМАС снайперлері тарапынан оқ атылды. Екі оқиға да Израиль бақылауындағы сары сызықтың шығыс жағында болды», — деді.
ХАМАС-тың жауабы
ХАМАС ұйымының жоғары лауазымды өкілі Израиль айыптауларын жоққа шығарып, «бұл — жалған айыптау» деп атады. DPA агенттігінің хабарлауынша, топ өкілі ешқандай әскери қимыл жасалмағанын айтып, керісінше, Израиль мен ЦАХАЛ-ды ережені бірінші болып бұзды деп айыптаған.
Рафах қаласы соңғы апталарда Израиль мен ХАМАС арасындағы шиеленістің негізгі нүктесіне айналды. Бұған дейін екі тараптың қатысуымен жасалған уақытша атысты тоқтату келісімі гуманитарлық мақсатта қабылданған еді. Алайда бұл оқиға соғыстың қайта өршу қаупін күшейтіп отыр.
