Израиль Иранның жаңа Бас штабы басшысының көзін жойғанын мәлімдеді

Ол бұл лауазымға бар-жоғы бірнеше күн бұрын ғана тағайындалған еді – алдыңғы басшы Мохаммад Багери 13 маусымда Израиль әуе соққысы кезінде қаза тапқан.

Шадманидің өлімі – нақты барлау негізінде жасалған операция

ЦАХАЛ таратқан мәліметке сәйкес, түнгі рейд кезінде Израиль әскери-әуе күштері Тегеран қаласының дәл ортасындағы командалық орталыққа соққы беріп, Шадманиді көздеген. Израиль армиясы мұны жоғары дәлдіктегі барлау операциясының нәтижесі деп сипаттады.

Али Шадмани – Иранның Жоғарғы рухани көсемі, аятолла Али Хаменейдің жақын серігі болған. Ол бұған дейін елдің "Хатам аль-Анбия" төтенше жағдайлар штабының басшысы ретінде Иранның Қарулы күштеріне, оның ішінде Ислам революциясының Сақшылар корпусы (КСИР) мен ресми армияға тікелей басшылық еткен.

 Израиль тактикасы қандай?

Шадманидің өлімі Иранның әскери командалық құрылымына ауыр соққы болып отыр. Израиль тарапы мұндай таңдамалы жою операциялары Иранның Израильге қарсы әскери стратегияларын әлсіретуге бағытталғанын мәлім етті.

Бұған дейін, 13 маусымда Израиль әскерилері Иранға ауқымды әуе соққы жасап, ядролық нысандарға, ракеталық базаларға және командалық пункттерге шабуыл ұйымдастырған. 200 әскери ұшақ қатысқан бұл операция кезінде Нетенз қаласындағы уран байыту зауыты да соққыға ұшыраған.

Бұл шабуыл барысында Иранның бірқатар жоғары шенді әскери тұлғалары қаза тапқан:

• КСИР бас қолбасшысы Хосейн Салами

• «Хатам аль-Анбия» штабының жетекшісі Голям-Али Рашид

• Аэрокосмостық күштер командирі Амир-Али Хаджизаде

• Дрон күштері басшысы Тахер Пур

• Әуе шабуылына қарсы қорғаныс басшысы Дауд Шихьян

Бұл деректер Иранның әскери элитасына қарсы мақсатты шабуыл жүріп жатқанын айғақтайды.

Нетаньяхудың қатаң мәлімдемесі

Израиль премьер-министрі Биньямин Нетаньяху бұл операциялардың жалғасатынын айтып, аятолла Хаменейді де жою мүмкіндігін жоққа шығармады. Оның пікірінше, бұл соғыс қимылдарының аяқталуына сеп болуы мүмкін.

«Иран бұл соғыста жеңіске жетпейді. Олар дереу келіссөзге келуі керек – тым кеш болмай тұрып», – деді Нетаньяху.

АҚШ-тың ұстанымы және G7 мәлімдемесі

G7 саммитінде де Иран мәселесі басты тақырыптардың бірі болды. Дегенмен, АҚШ президенті Дональд Трамп саммиттен ерте кетіп, бұл жағдайды «адам өмірін босқа ысырап ету» деп бағалады. Ол әлеуметтік желідегі мәлімдемесінде Иранмен келісімге келу керек болғанын, бірақ Тегеран ұсынылған шартты қабылдамағанын жазды.