Жазылу
Израиль Рамазан мен Пасха мейрамында Газада атысты тоқтатуға дайын
Израиль АҚШ-тың Таяу Шығыстағы арнайы өкілі Стив Виткоффтың мұсылмандардың қасиетті Рамазан айы мен еврейлердің Пасха мейрамы кезінде Газа секторындағы атысты тоқтатуды ұзарту туралы ұсынысын мақұлдады.
Бұл туралы премьер-министр Беньямин Нетаньяху кабинеті хабарлады.
Осы уақыт ішінде Израиль билігі Газа секторындағы қақтығысты реттеу үшін АҚШ пен Еуропада лаңкестік топ деп танылған ХАМАС тобымен келісімнің екінші кезеңінің егжей-тегжейлерін пысықтауы керек.
Виткофф ХАМАС өз тарапынан бітім шартын бұзбаса, ХАМАС-тың кепілге алынғандарының жартысын бітім басталғанда, ал қалған жартысы соңында Израильге тапсырылуын ұсынды.
Қазіргі уақытта Газа секторында 2023 жылдың 7 қазанында ұрланған 59 адам бар. Олардың кем дегенде 35-і қайтыс болды. Олардың екеуі тірі, ал үшеуі көз жұмған. Оның орнына Израиль ХАМАС-қа қатысы бар деп сотталған жүздеген палестиналықтарды түрмеден босатады.
ХАМАС бұған дейін Израильдің бітімгершілік жоспарының бірінші кезеңін ұзарту туралы ұсынысын қабылдамады және кепілге алынғандарды босатумен қатар, Газа секторынан Израиль әскерлерін шығаруды қамтитын екінші кезеңге тікелей өтуді талап етті.
Ислам дінін ұстанушылар үшін қасиетті Рамазан айы өткен жұмада басталып, 29 наурызға дейін жалғасады. Пасха мейрамы биыл 19 сәуірге келеді.
15 қаңтарда Израиль мен ХАМАС медиаторлары арқылы Газада атысты тоқтату және Израиль түрмелерінде отырған екі мыңға жуық палестиналық тұтқынға кепілге айырбастау туралы келісімге келді.
2023 жылдың 7 қазанында ХАМАС-тың Израильге жасаған шабуылы нәтижесінде 1200-ге жуық адам қаза тауып, 250-ге жуық адам кепілге алынды. Бұған жауап ретінде Израиль Газа секторында әскери операция бастады, ХАМАС бақылауындағы Газа Денсаулық сақтау министрлігінің мәліметінше, бұл аймақтың 45 мыңнан астам тұрғыны қаза тапты.
