Израиль Йемен астанасына әуеден шабуыл жасады

Әуе шабуылы Сана қаласының халық тығыз қоныстанған оңтүстік және батыс аудандарында тіркелді. Шабуыл кезінде Иран қолдайтын хуситтердің спутниктік телеарнасы қозғалыс жетекшісі Абдул-Малик әл-Хусидің жазылған сөзін көрсетіп жатқан болатын.

Израиль тарабы соққы «хуситтердің әскери нысанына» бағытталғанын мәлімдеді, бірақ нақтылау жасамады.

Йеменнің Саба агенттігі қозғалыс жетекшілері зардап шекпегенін жаз. Хуситтердің қорғаныс министрлігіндегі дереккөздің айтуынша, соққылар бейбіт нысандарға жасалған, себебі Йемен халқы түгелдей Газа секторына қолдау білдіруде.

Осы аптада хуситтер Израильге бағытталған дрон ұшырған болатын. Бұл – соңғы бір аптадағы үшінші шабуыл. Бұған жауап ретінде Израиль бірнеше күн бұрын Санаға әуе соққысын жасап, кемінде 10 адам қаза тапқан. Нысанаға хуситтер бақылауындағы мұнай компаниясының объектілері, электр станциясы және президент сарайы маңындағы әскери нысан алынған еді.

Хуситтер Израильге қарай зымырандар мен дрондар ұшырып қана қоймай, Қызыл теңіздегі кемелерге де шабуыл жасаған. Олар бұл әрекеттерін палестиналықтарға қолдау көрсету деп түсіндіреді.

Израиль мен АҚШ бастаған коалиция соңғы айларда Йемендегі хуситтер бақылауындағы аумақтарға, соның ішінде Сана мен стратегиялық маңызы бар Ходейда қаласына бірнеше рет соққы жасады. Мамыр айында Израильдің шабуылы Сана әуежайын істен шығарған болатын.

АҚШ президенті Дональд Трамп әкімшілігі мамыр айында хуситтермен келісімге келгенін, оған сәйкес әуе соққылары тоқтатылып, ал қозғалыс Қызыл теңіздегі кеме қатынасына шабуыл жасамауы тиіс екенін жариялаған. Алайда хуситтер бұл келісім Израильге қатысты нысандарға шабуылды тоқтатуды қамтымайды деп мәлімдеді.