Камчаткада 8 балдық жер сілкінісі болды: цунами қаупі Тынық мұхитына тарады

Жер сілкінісі ошағы Петропавловск-Камчатский қаласынан 119 шақырым оңтүстік-шығыста, шамамен 19,3 шақырым тереңдікте болған. Бастапқыда жер сілкінісі 8,0 магнитуда деп бағаланғанымен, кейінірек 8,8-ге дейін жаңартылды. Сондай-ақ, магнитудасы 6,9 бірнеше қосалқы дүмпулер де тіркелді.

Камчатка аймағының губернаторы Владимир Солодов бұл жер сілкінісін «кейінгі онжылдықтардағы ең күшті сейсмикалық оқиға» деп атады. Оның айтуынша, аймақтағы бірнеше ғимаратқа зақым келген, тұрғындар қауіпсіз жерлерге уақытша эвакуацияланған.

Цунами дабылы жарияланды

Жер сілкінісінен кейін Камчатка жағалауы мен Тынық мұхиты бойындағы бірнеше елде цунами қаупіне байланысты дабыл жарияланды. Ресейдің Төтенше жағдайлар министрлігі жағалаудағы тұрғындарды қауіпсіз қашықтыққа шұғыл көшуге шақырды. Камчатканың солтүстік-шығысындағы Северов-Курильск қаласында 3–4 метр биіктіктегі цунами толқындары тіркелген.

Жапония мен Гавайиде эвакуация басталды

Жапонияның метеорологиялық агенттігі елдің шығыс жағалауына 3 метрге дейінгі толқындар жетуі мүмкін екенін хабарлап, 900 мыңнан астам адамды эвакуациялау туралы шешім қабылдады. Фукусима АЭС қызметкерлері де қауіпсіздік мақсатында уақытша көшірілді.

АҚШ цунами ескерту қызметінің мәліметінше, 1–3 метр аралығындағы толқындар Гавайи, Эквадор, Чили, Соломон аралдары мен Жапония жағалауына жетуі мүмкін. АҚШ-тың Батыс жағалауында да төмен деңгейдегі толқындар байқалуы ықтимал.

Зардаптар мен қауіпсіздік шаралары

Ресейдің Денсаулық сақтау министрлігі бірнеше адамның жеңіл жарақат алғанын растады. Олардың бірі – терезеден секіріп кеткен тұрғын, тағы бірі – әуежайда жарақат алған әйел. Балабақшалар мен мектептер уақытша жабылды, кейбір ғимараттарға сызаттар түскені хабарланды.

Қазіргі таңда Камчаткада электр қуаты мен байланыс желілері біртіндеп қалпына келтірілуде. Құтқару топтары тұрғындарға гуманитарлық көмек көрсетіп жатыр.

Сейсмологтар не дейді?

Ресей Ғылым академиясының сейсмологтары бұл зілзаланы аймақта 1952 жылдан бері тіркелген ең күшті жер сілкінісі ретінде бағалап отыр. Сол жылғы 9,0 магнитудалы сілкініс Северов-Курильск қаласында 18 метрлік цунамиді тудырып, 2 мыңнан астам адамның өмірін қиған еді.

Сарапшылардың айтуынша, алдағы күндері Камчатка маңында әлсіз немесе орташа деңгейдегі афтершоктар (қайталама дүмпулер) жалғасуы мүмкін.