Қарағандыда полицейлер ұстаған 65 жастағы зейнеткер қайтыс болды

Николай Степанюганы биыл 5 қыркүйекте өзі туып-өскен Бұқар жырау ауданындағы Керней ауылында полиция ұстаған. Туыстарының айтуынша, екі учаскелік полиция инспекторы оны арақ ішті деп айыптап, алып кеткен.

«Екі учаскелік полиция қызметкері менің әкемді көршісінің көзінше мазақ етіп, оны бейнекамераға түсіріп алып, қолына кісен салып, әкеткен. Арадан 50 минут өткенде әкем ауруханаға түскен. Осы уақыт ішінде оған не істегені белгісіз. Бірақ әкесмнің жансақтау бөліміне түсіп, жүрек талмасынан қайтыс болғаны олардың кінәсі», - деді марқұмның ұлы Станислав Степанюга.

Зейнеткердің жақындары учаскелік полиция инспекторлары қызметтік өкілеттіктерін асыра пайдаланды деп есептейді. 

Николай Степанюганың туыстары облыстық полиция департаментінің ішкі қауіпсіздік басқармасына арыз жазып, бұл факті бойынша жан-жақты қызметтік тексеру жүргізіледі деп үміттенеді.

Қарағанды ​​облысының полиция департаменті марқұмның туыстарының тағылған айыптарына жауап берді. Ведомствоның мәліметінше, олардың марқұмға қатысты заңсыз әрекеттері туралы арызы бойынша қызметтік тексеру жүргізілген. Өтініш берушілердің дәлелдері объективті түрде расталмады. Бөлім сонымен қатар полицияның бейне белгісінен жазбаны ұсынды.

«5 қыркүйекте сағат 13:28-де Бұқар жырау аудандық ІІБ учаскелік полиция инспекторлары қоғамдық орында ішімдік ішкені үшін Николай Степанюга әкімшілік жауапкершілікке тартылды. Сондай-ақ, медициналық тексеру жүргізген жергілікті дәрігерлік амбулатория қызметкерлері алдын ала мәлімет бойынша, азаматтың өліміне инфаркт себеп болған. Оның өліміне әкеп соқтырған дене жарақаттары жоқ», - дейді  Қарағанды ​​облыстық полиция департаментінің баспасөз қызметі.

Ал, марқұм зейнеткердің туыстары полицейлер ұсынған видеоның толық емес екеніне сенімді. Олардың айтуынша, онда жазбаның басы мен соңы жоқ.