Жазылу
Қарағандыдағы шахта апатынан зардап шеккендердің жағдайы қалай?
Қарағандыда Костенко шахтасында болған жарылыстан зардап шеккен 10 адам ауруханада жатыр. Олардың жағдайы туралы Қарағанды облысының әкімі Ермағанбет Бөлекпаев айтты.
"10 зардап шегуші медициналық мекемелерде бақылауда, олардың жағдайы орташа және жеңіл дәрежеде. Зардап шеккендерге қажетті медициналық көмек көрсетіліп жатыр", - деді Бөлекпаев.
Естеріңізге сала кетейік, жарылыстан кейін 27 зардап шегуші қалалық ауруханаларға жатқызылды.
28 қазанда Қарағанды облысындағы Костенко атындағы шахтада жарылыс болды. 46 кенші қаза тапты.
Мемлекет басшысы Қасым-Жомарт Тоқаев Қарағанды облысындағы кеншілердің қазасына байланысты көңіл айтып, «АрселорМиттал Теміртау» компаниясымен ынтымақтастықты тоқтатуды тапсырды. Кейін үкімет «АрселорМиттал Теміртауды» Қазақстан өз меншігіне алу бойынша мәміленің аяқталғанын хабарлады.
