Қарағандыдағы зорлау ісі: күдіктілердің туыстары істі тоқтатуды талап етті

 Күдіктілердің туыстары қылмыстық істі тоқтатуды талап етіп, жалдамалы пәтерде ешқандай қылмыс болмағанын мәлімдеді.

Күдіктілердің бірінің туысының айтуынша, жәбірленуші қыз полицияға арызды оқиғадан кейін он күн өткен соң ғана берген. Ол бұл уақыт ішінде қыздың қалыпты өмір сүріп, түнгі клубтар мен кафелерге барғанын алға тартты.

Сондай-ақ, оның сөзінше, жанжал WhatsApp арқылы тараған видеоға байланысты шыққан. Күдіктілер моральдық зиян үшін ақша төлеген, алайда видео басқа адамдар арқылы әрі қарай таралғаннан кейін бұл жайтты қыздың ата-анасы білген. Осыдан соң қыз өзін зорлағанын айтқан.

Күдіктілердің туыстары жәбірленуші тарап 100 миллион теңге талап еткенін, ал бұл талап орындалмаса, жасөспірімдер ұзақ мерзімге сотталатынын айтқан. Олар уәкілетті органдардан қылмыстық істі қылмыс құрамы болмауына байланысты тоқтатуды сұрап отыр.

Ал жәбірленуші тараптың айтуынша, оқиға 2025 жылғы 14 ақпанда болған. Қыз құрбысымен бірге түнгі клубтан кейін ес-түссіз күйде бейтаныс пәтерде оянған. Әкесі қызына психотропты зат қосылған болуы мүмкін екенін, оны бірнеше сағат бойы еркінен тыс ұстап, зорлағанын және бұл әрекеттердің видеоға түсіріліп, таратылғанын мәлімдеді.

Қазіргі таңда іс бойынша тергеу жалғасып жатыр.