Қарашөкеев азық-түлік бағасын «түсіндіру жұмысы» арқылы реттемек

Айтуынша, келісін 2700 теңгеден алып жүрген фарш 3000 теңгеге шарықтап шыға келсе, 150 теңгенің картоп-пиязын 200 теңгеден алған. Бұл ретте Қарашөкеев те 2025 жылдың алғашқы аппараттық жиынын қымбатшылыққа, бас бермей өсіп жатқан азық-түлік бағаларын тұрақтандыруға арнауына тура келді.

Облыста өткен жылдың қорытындысына сәйкес әлеуметтік маңызы бар бірнеше азық-түлік тауарының бағасы күрт қымбаттап кеткен. Атап айтсақ, нан 165 теңгеден 198 теңгеге қымбаттаса, жұмыртқа 492-ден 507 теңгеге, айран 362-ден 403 теңгеге, тұз 65-тен 75 теңгеге, тауық еті 1115-тен 1317 теңгеге, тұздалмаған сары май 3520-дан 4647 теңгеге, сүзбе 1805-тен 2013 теңгеге, сиыр еті 2362-ден 2579 теңгеге, картоп 145-тен 191 теңгеге, пияз 145-тен 191 теңгеге, қырыққабат 139-дан 147 теңгеге, күнбағыс майы 713-тен 754 теңгеге қымбаттаған. Бұл тауар түрлері бойынша мыңдаған тонна тауарға тұрақтандыру қоры арқылы интервенция жасалып келгенін айта кеткеніміз жөн. Биыл да 2025 жылдың маусымаралық кезеңінде 8 тауар түрі бойынша ірі сауда желілеріне, дүкендерге, базарларға 746,1 тонна, 2566,8 мың дана және 75,6 мың литр тауарға интервенция жүргізу жоспарланыпты. Азық-түлік тауарларының тапшылығын болдырмау мақсатында өңірлік тұрақтандыру қорында тікелей сатып алу арқылы және форварттық келісімшарт негізінде 13 569,5 тонна және 4 731,6 мың дана тауар қоры қалыптасқан.

Жаңа жылдан бері ұн мен қарақұмық бағасы арзандады деген басқарма басшысы соңғы бір апта ішінде 5 әлеуметтік маңызы бар азық-түлік тауары – тауық еті, қырыққабат, жұмыртқа, күнбағыс майы, картоп бағасы тағы көтерілгенін айтты. Бұл ретте әлеуметтік маңызы бар санатқа жатпайтын азық-түліктердің өзге түрлерінің нешесі қанша пайызға қымбаттап үлгергені бір Құдайға аян. Олай дейтініміз – ол бойынша мониторинг жүргізілмеген.

Ал Сауда және тұтынушылардың құқықтарын қорғау департаментінің басшысы Еркін Елшібековтің сөзінше, өткен жылы азық-түлік тауарларына сауда үстемеақысын 15 пайыздан асырған 72 кәсіпкерге ескерту беріліп, жетеуіне айыппұл (627 640 теңге) салыныпты. Сонымен бірге сөредегі тауар құны мен кассадағы баға айырмашылығы үшін 9 сауда нүктесі 1 956 760 теңге көлемінде айыппұл арқалаған.

Дейтұрғанмен, әлеуметтік маңызы бар азық-түлік тауарларының бағасына жүргізілген мониторингтен нақты нәтиже болмай тұр. Қарашөкеев те «Азық-түлік бағаларын тұрақтандыру өте маңызды. Бұл бағыттағы шараларға ерекше назар аудару қажет. Сауда департаменті мониторинг, ал жергілікті әкімдіктер түсіндіру жұмыстарын күшейту тиіс. Азық-түлік тауарлары бағаларының шекті межеден аспауын жіті бақылауда ұстау керек. Өңір тұрғындарын арзандатылған азық-түлік өнімдерімен қамтамасыз ету үшін ауыл шаруашылығы жәрмеңкелерін тұрақты түрде ұйымдастыру керек» деп жауапты басшыларға дүкендерді өздері аралап, бағалардың нақты жай-күйімен көзбе-көз танысуды тапсырған болатын.

Бас бермей бара жатқан бағаны тұрақтандыру Қарашөкеевтің қолынан келе ме, оны енді уақытында көре жатармыз. Алайда өңір тұрғындарын арзандатылған азық-түлік өнімдерімен қамтамасыз ету үшін тек ауыл шаруашылығы жәрмеңкелерін өткізумен, кәсіпкерлерге түсіндіру жұмысын жүргізгенмен мәселе шешілмейтінін Шырақбайұлының да «іші білетін» шығар.

Нұрболат ӘЛДИБЕК,

Жамбыл облысы