Қаржы мониторингі агенттігі екі шетелдікке іздеу жариялады

Іздестіріліп отырғандар:

• Дмитры Дружинский, 1970 жылғы 27 маусымда туған, АҚШ азаматы;

• Марина Левкович (Гинзбург), 1985 жылғы 8 қарашада туған, Украина азаматы.

Сот санкциясымен оларға сырттай қамауда ұстау түріндегі бұлтартпау шарасы қолданылған.

ҚМА мәліметінше, аталған адамдар Қазақстан аумағында заңсыз ойын бизнесін ұйымдастырды деген күдікке ілінген.

"Тергеу барысында PIN-UP және PINCO брендтерімен жұмыс істеген онлайн-казиноның шетелден әрекет еткен адамдар арқылы басқарылғаны анықталды. Д.Дружинский мен М.Левкович координаторлық функцияларды атқарып, сыбайластарды іріктеу, төлем ұйымдары мен екінші деңгейлі банктер өкілдерімен өзара жұмыс жасау сияқты қызметтерге қатысқан. Сондай-ақ, ақша қабылдау мен шығару процесін қамтамасыз ететін төлем инфрақұрылымын құрған және оның жұмысын бақылаған", – делінген хабарламада.

Заңсыз қызметті бүркемелеу үшін PIN-UP.KZ брендімен букмекерлік қызметті жүзеге асыруға мемлекеттік лицензия алған "Бонами" ЖШС заңды тұлғасы құрылған.

Сонымен қатар, хабарламада онлайн-казино клиенттерінен түскен қаражат транзит шоттарда жинақталып, кейін криптовалютаға айырбасталғаны айтылған.