Жазылу
Қасым-Жомарт Тоқаев 26-27 қарашада Бішкекке барады
Қазақстан президенті Қасым-Жомарт Тоқаев осы аптада Қырғызстан астанасы Бішкекке ресми сапармен барады. Бұл туралы 24 қарашада Ақорда хабарлады.
ҰҚШҰ саммиті: негізгі мәселелер
26-27 қараша күндері Тоқаев Ұжымдық қауіпсіздік туралы шарт ұйымының (ҰҚШҰ) Қауіпсіздік кеңесі сессиясына және оған дейін өтетін бірқатар отырыстарға қатысады.
27 қарашада Бішкекте өтетін бірлескен жиында:
- Сыртқы істер министрлері кеңесі (СІМК),
- Қорғаныс министрлері кеңесі (ҚМК),
- Қауіпсіздік кеңестері хатшылары комитеті (КСХК),
- сондай-ақ ҰҚШҰ Ұжымдық қауіпсіздік кеңесінің (ҰҚК) сессиясы өтеді.
Күн тәртібінде ұйым аясындағы ынтымақтастықты күшейту, оның ішінде есірткінің заңсыз айналымына қарсы күрес, заңсыз көші-қонға қарсы шаралар, және аймақтағы қауіпсіздік мәселелері бар.
Жаңа бас хатшы таңдалады
ҰҚШҰ саммитінде:
- Ұйымға мүше мемлекеттердің қауіпсіздік бойынша ортақ ұстанымдарын қамтитын Декларация қабылданады;
- 2026–2029 жылдарға арналған ҰҚШҰ-ның жаңа бас хатшысы таңдалады;
- 2026 жылы Ресей Федерациясының төрағалығы кезеңіндегі басым бағыттар жарияланады.
Қазіргі бас хатшы – Иманғали Тасмағамбетов. Ол бұл қызметті 2023 жылғы 1 қаңтардан бері атқарып келеді.
Айта кетейік, 24 қараша күні мемлекет басшысы Астана әуежайында Түркіменстан президенті Сердар Бердімұхамедовті қарсы алды. Түркіменстан басшысы Қазақстанға мемлекеттік сапармен келді.
