Қасым-Жомарт Тоқаев: Ғылым – прогрессивті мемлекеттің іргелі тірегі

Президент өз сөзінде адамзат қол жеткізген барлық жетістіктердің негізінде ғалымдардың қажырлы еңбегі жатқанын атап өтті, деп хабарлайды Ақорданың баспасөз қызметі.

 Ғылыми капитал – ел беделінің өлшемі

Президент Ақордадағы мұндай кездесулердің игі дәстүрге айналғанын тілге тиек етіп, бұл ғылыми қауымдастықтың еңбегіне деген ерекше құрмет екенін жеткізді.

«Ғылым – прогрессивті мемлекеттің іргелі тірегі, ал ғалымдар – оның басты байлығы. Елдің ғылыми капиталы оның халықаралық аренадағы беделінің негізгі өлшеміне айналатынын нық сеніммен айтуға болады», — деді Мемлекет басшысы.

 Зияткер ұлт және Абай мұрасы

Қасым-Жомарт Тоқаев тек білім мен ғылымды биік қойған «зияткер ұлттар» ғана әлемдік дамудың алдыңғы шебінде бола алатынын баса айтты. Сондай-ақ, Президент ұлы Абайдың сөзін мысалға келтіре отырып, ғалымдардың ұлттың жаңа сапасын қалыптастырудағы рөліне тоқталды.

Президент Қазақстанның бәсекеге қабілетті ел болуы үшін ғылымды дамытудың стратегиялық маңызына тоқталды. Мемлекет басшысының айтуынша, қазіргі таңда жаңа технологияларды  игеру және жасанды интеллект (ЖИ) саласын дамыту – басты басымдықтардың бірі.

Мемлекет басшысы еліміздің ғылыми әлеуетін нығайтуға үлес қосып жүрген барша ғалымдарға шынайы ризашылығын білдіріп, олардың еңбегі мемлекеттің дамуына серпін беретінін атап өтті.