Қаскелеңде ер адам моншада 13 жастағы жасөспірімді ұрған

Оқиға бойынша қылмыстық іс қозғалды.

Жасөспірімнің анасының айтуынша, оның ұлы досымен бірге моншаға барып, сол жердегі бардан тамақ алмақ болған. Сол кезде мас күйдегі ер адам балаға келіп, өзіне де тамақ алып беруді талап еткен.

Жанжалдан кейін ер адам жасөспірімге шабуыл жасаған. Оқиға сәті бейнебақылау камераларына түсіп қалған.

Монша әкімшілігінің мәліметінше, жанжалға қатысқан адам – олардың қызметкері, яғни жүргізуші болып жұмыс істеген. Алайда оқиға болған күні ол демалыста болып, қонақ  ретінде келген. Ер адам 28 жаста. Оқиғадан кейін басшылық оны жұмыстан шығарған.

Полиция жасөспірімді ұрып-соғу дерегі бойынша қылмыстық іс қозғалғанын растады. Қазіргі уақытта күдіктінің жауапкершілігі мәселесі қарастырылып жатыр.

Құқықбұзушылықтың саралануына байланысты оған айыппұл салынуы немесе 20 тәулікке дейін әкімшілік қамауға алу жазасы қолданылуы мүмкін.