Жазылу
Қазақстан азаматтарын алдаумен айналысқан трансұлттық call-орталық анықталды
Қазақстан азаматтарына қарсы жасалған ірі алаяқтық әрекет дерегі анықталды. Ішкі істер министрлігінің (ІІМ) хабарлауынша, шын офис, әкімшілері, HR-менеджерлері және тіпті «құқық қорғау бөлімі» бар ұйым Черновцы мен Одесса қалаларында жұмыс істеген.
Олардың қызметкерлері қазақстандықтарға телефон шалып, өздерін банкирлер, құқық қорғау органдары және арнайы қызмет қызметкерлері ретінде таныстырған.
ІІМ мәліметіне сүйенсек, алаяқтар азаматтарды «терроризмді қаржыландыру» сияқты қылмыстармен қорқытып, кредит алуын талап еткен және ақшаларын аударуға мәжбүрлеген. Сендіру үшін олар дипфейк технологиясын қолданған — яғни жасанды интеллект арқылы адамдардың бетін және дауысын өзгертетін құралдарды пайдаланған.
23 қыркүйек күні ІІМ Қазақстан полициясы, Украина полициясы және екі елдің прокуратураларының бірлескен күштерімен ауқымды арнайы операция өткізді. Нәтижесінде тек қазақстандықтарға бағытталған трансұлттық алаяқтық call-орталық жойылды.
Алдын ала мәліметтерге қарағанда, қазақстандықтарға келген шығын көлемі әлі есептеліп жатыр. Алаяқтық схеманың кеңдігі мен кәсіби ұйымдастырылғандығы қоғамды алаңдатуда. ІІМ азаматтарға белгісіз нөмірлерден келетін қоңырауларға сақтықпен қарауға және күмәнді ұсыныстарға тез сенбеуге кеңес береді.
