Қазақстан азаматтарын Таяу Шығыстан эвакуациялау аяқталды

Ведомство мәліметінше, жалпы алғанда Қазақстан Республикасының 10 275 азаматы елге қайтарылды.

Эвакуация әртүрлі бағыттар арқылы жүргізілді: әуе және құрлық жолдары пайдаланылды. Бұған дейін қазақстандықтарды елге жеткізу үшін Дубай, Шарджа, Жидда, Медина және Маскат қалаларынан Алматы, Астана, Атырау, Ақтау және Шымкент қалаларына рейстер ұйымдастырылғаны хабарланған болатын. 12 наурызға дейін рейстер саны 61-ге жетіп, сол уақытқа дейін 10 033 адам эвакуацияланған еді.

Министрліктің атап өтуінше, өңірдегі Қазақстанның дипломатиялық өкілдіктері шетел мемлекеттерінің құзырлы органдарымен өзара іс-қимылды үйлестіріп, отандастармен тұрақты байланыс орнатып, оларға қажетті көмек көрсеткен.

Таяу Шығыстағы жағдайдың ушығуына байланысты Қазақстанның Сыртқы істер министрі Орталық Азия елдері мен Әзербайжан әріптестерімен кеңес өткізген. Сонымен қатар министр Ираннан қазақстандықтарды эвакуациялауға көрсеткен көмегі үшін Түрікменстан мен Әзербайжанға алғыс білдірді.

Қазақстанның Сыртқы істер министрлігі азаматтардың елге қауіпсіз оралуын қамтамасыз етуге қатысқан мемлекеттік органдар мен шетелдік серіктестерге ризашылық білдірді.

Interfax-Kazakhstan агенттігінің мәліметінше, 10 наурыздағы жағдай бойынша өңірдегі қазақстандықтар арасында қаза тапқандар немесе жараланғандар ресми түрде тіркелмеген.