Қазақстан делегациясы Люксембургтегі форумға қатысты

 Бұл кездесу Қазақстан мен Еуропалық одақ арасындағы көпжақты ынтымақтастықтың жаңа кезеңін айқындады.

Кездесуде Арман Ісетов Еуропалық комиссияның вице-президенті, ЕО-ның сыртқы істер және қауіпсіздік саясаты жөніндегі жоғары өкілі Кая Каллас, халықаралық әріптестік жөніндегі комиссар Юзеф Сикела және Еуропалық одақтың Орталық Азия бойынша арнайы өкілі Эдвард Стипрайспен пікір алмасты. Тараптар өзара сенімге, құрметке және ортақ мүдделерге негізделген серіктестіктің нәтижелі дамып келе жатқанын атап өтті.

Қазақстан мен ЕО арасындағы ынтымақтастықтың берік құқықтық іргетасы — Кеңейтілген серіктестік және ынтымақтастық туралы келісімге биыл 10 жыл толады. Бұл құжат екіжақты қатынасты сапалық тұрғыда жаңа деңгейге шығарды. Бүгінде тараптар көлік және логистика, «жасыл» энергетика, цифрлық трансформация, ауыл шаруашылығы, білім мен ғылым, сондай-ақ сирек металдар мен шикізат жеткізу салаларында нақты жобаларды жүзеге асырып жатыр.

Арман Ісетов өз сөзінде Қазақстан мен Еуропалық одақтың ынтымақтастығы тек екіжақты форматта емес, Орталық Азия елдері арасындағы өзара байланыстарды дамытуға да ықпал ететінін айтты. Бұл бағытта Самарқандта өткен «Орталық Азия – ЕО» саммитінде қабылданған келісімдер ерекше мәнге ие.

Кездесуде сондай-ақ Президент Қасым-Жомарт Тоқаевтың «Жасанды интеллект дәуіріндегі Қазақстан» атты қыркүйектегі Жолдауында белгіленген реформалар талқыланды. Цифрлық экономиканы дамыту, инновацияларды енгізу және деректер қауіпсіздігін қамтамасыз ету бағыттары Қазақстанның жаңа даму стратегиясының негізі ретінде таныстырылды.

Форум аясында Қазақстанның Бельгия мен Люксембургтегі елшісі Роман Василенко да сөз сөйледі. Ол Еуропа мен Орталық Азия арасындағы көлік байланысын нығайту — басты басымдық екенін атап өтті. Қазақстан соңғы жылдары инфрақұрылымға 35 миллиард доллар инвестиция салып, алдағы бес жылда тағы 15 миллиард доллар жұмсауды жоспарлап отыр. Бұл қаражат Транскаспий халықаралық көлік дәлізін (Орта дәліз) дамытуға бағытталған.

Орта дәліз бүгінде жылына шамамен 6 миллион тонна жүк өткізе алады. Алайда Қазақстан, Әзірбайжан, Грузия және Түркияның бірлескен күш-жігері арқасында бұл көрсеткіш 2030 жылға қарай 10–11 миллион тоннаға жетуі мүмкін. Василенконың айтуынша, Армения мен Әзірбайжан арасындағы бейбіт реттеу процесі осы дәліздің жаңа тармақтарын ашуға мүмкіндік береді.

Люксембургтегі келіссөздер Қазақстанның халықаралық беделін тағы да айқындады. Еліміздің дипломатиялық ұстанымы – құрметке, теңдікке және өзара пайдаға негізделген серіктестік. Бұл форум – сол ұстанымның нақты дәлелі. Еуропамен жаңа сапалы әріптестік Қазақстан экономикасының әртараптануына, өңірлік тұрақтылық пен байланысқа жол ашады.