Қазақстан Иран төңірегіндегі диалогқа араағайын болуға әзір

 Бұл туралы ҚР Сыртқы істер вице-министрі Әлібек Бақаев Таяу Шығыстағы шиеленіске қатысты пікір білдірген кезде айтты.

Оның сөзінше, Қазақстанның ұстанымы өзгермейді: ел үшінші мемлекеттердің ішкі ісіне араласпау саясатын ұстанады.

«Қазақстан үшінші елдердің ісіне араласпау қағидатын бұрын да ұстанды, қазір де ұстанады және болашақта да сол бағыттан таймайды», - деді ол.

Сондай-ақ Астана қақтығысқа қатысушы тараптардың ешқайсысын қолдамайтынын айтты.

«Біз мұндай қақтығыстар халықаралық құқық пен Біріккен Ұлттар Ұйымы Жарғысына сәйкес шешілуі тиіс деп есептейміз. Бұл – біздің тұрақты ұстанымымыз», - деді Бақаев Үкіметтегі брифингте.

Вице-министр Қазақстанның бұған дейін де халықаралық келіссөздерге алаң ұсынып келген тәжірибесі бар екенін еске салды. Егер ресми өтініш түссе, ел диалог ұйымдастыру мүмкіндігін қарастыруға дайын. Әзірге мұндай өтініш келіп түспеген.