Қазақстан қарақалпақ белсендісіне босқын мәртебесін беруден бас тартты

«Астана соты алдыңғы инстанциялардағы шешімді күшінде қалдырды – Қазақстан маған босқын мәртебесін беруден түбегейлі түрде бас тартты. Өкінішке қарай, жай-жапсарын айта алмаймын. Мені қолдап, отырысқа келгендерге алғыс айтамын», - деп жазды белсенді Ақылбек Мұратбай.

Оның айтуынша, көптеген елдердің қатаң көші-қон саясатына байланысты басқа мемлекетке кету процесі де оңай болмай отыр.

Айта кетейік, Ақылбек Мұратбай – Өзбекстан азаматы, Қазақстанда он жылдан астам уақыт тұрып келеді. 2022 жылдың шілдесінде Нөкісте өткен наразылықты билік күшпен басып-жаншығаннан кейін қарақалпақ белсенділері өз елінде қуғынға ұшырады. Ақылбек осы оқиғадан соң әлеуметтік желіде қарақалпақтардың жағдайын ашық айтып жүргендердің бірі болды.