Қазақстанда 6 балдық жер сілкінісі болды

Бұл туралы Төтенше жағдайлар министрлігіне қарасты «Сейсмологиялық зерттеу институты» ЖШС мәлімдеді. Жерасты дүмпулері Астана уақытымен сағат 14:30-да тіркелген.

Жер сілкінісінің эпицентрі Алматы қаласынан оңтүстік-батысқа қарай 334 шақырым жерде орналасқан. Сондай-ақ, Тараз бен Бішкек тұрғындары 4.8 магнитудалы жер сілкінісін сезді. Жер сілкінісінің ошағы Жамбыл облысында, Қырғызстан шекарасына жақын орналасқан.

EMSC қосымшасының пікірлерінде Қазақстан мен Қырғызстан тұрғындары аздаған дүмпулер мен жиһаздың қозғалғанын жазып жатыр.
Сілкініс күші елдің бірнеше елді мекенінде сезілді:

• Құлан – 6 балл;
• Мерке – 5 балл;
• Шу, Сарыкемер, Төле би, Тараз – 3 балл;
• Аса, Мойынқұм, Қордай, Бауыржан Момышұлы, Қаратау, Тұрар Рысқұлов – 2 балл.

Төтенше жағдайлар вице-министрі Батырбек Әбдішевтің төрағалығымен ТЖМ командалық орталығының жедел штабы бейнеконференция форматында жиналыс өткізді. Онда өңірдегі ахуал егжей-тегжейлі талқыланды.

ҚР ТЖМ-нің жеке құрамы мен техникалық құралдары кез келген жағдайға жедел әрекет етуге толық дайын. Қазіргі уақытта қирау немесе зардап шеккендер туралы ақпарат тіркелген жоқ.