Қазақстанда су тасқынына қарсы ауқымды дайындық жүргізіліп жатыр

Жиында Олжас Бектенов төрағалық етсе, негізгі баяндама жасаған Төтенше жағдайлар министрі Шыңғыс Әрінов елдегі дайындық деңгейін таныстырды.

Министрдің айтуынша, ықтимал су тасқынына қарсы әрекет ету үшін 39 мыңнан астам адамнан тұратын арнайы топ құрылып, 18 мыңнан астам техника мен арнайы құралдар жұмылдырылған. Негізгі күштер су басу қаупі жоғары өңірлерге бағытталған. Олардың қатарында Солтүстік Қазақстан, Ақмола, Қарағанды, Шығыс Қазақстан облыстары және Абай облысы бар.

Сонымен қатар, қосымша резерв те қарастырылған. Оның құрамында 930 қызметкер, 100-ден астам техника, ондаған жүзу құралдары мен мотопомпалар бар. Бұл күштер қажет болған жағдайда жедел түрде ең осал аймақтарға жіберіледі.

Шыңғыс Әрінов атап өткендей:
«Біз алдын ала ең қауіпті өңірлерде күштерді шоғырландырып, гидрологиялық жағдайды тұрақты бақылауда ұстап отырмыз. Жағдай күрделенген жағдайда қосымша бөлімшелер дереу су басу аймақтарына жіберіледі».

Дайындық аясында құтқару қызметтерінің әрекеті арнайы «Көктем» республикалық оқу-жаттығуы барысында тексерілді. Бұл жаттығуларда ведомствоаралық өзара іс-қимыл, халықты эвакуациялау және уақытша орналастыру жүйесі пысықталды.

Бүгінде ел бойынша 3 857 уақытша орналастыру пункті дайындалған. Олар 1,4 миллионнан астам адамды қабылдай алады.

Сонымен қатар, соңғы жылдары төтенше жағдайлар қызметінің материалдық-техникалық базасы да нығайтылған. Жаңа техника, құтқару жабдықтары мен әуе көліктерінің алынуы апаттарға жедел әрекет ету мүмкіндігін арттырды.

Қазіргі уақытта Төтенше жағдайлар министрлігінің жедел штабы тәулік бойы жұмыс істеп, 1 200-ден астам су тасқыны қаупі бар елді мекенге тұрақты мониторинг жүргізілуде. Барлық азаматтық қорғау қызметтері күшейтілген режимге көшірілген.

Жалпы алғанда, қабылданып жатқан шаралар көктемгі кезеңде болуы мүмкін табиғи қауіптердің алдын алып, халықтың қауіпсіздігін қамтамасыз етуге бағытталған.