Жазылу
Қазақстандық бітімгерлер Наурызды Голан жотасында атап өтті
Қазақстандық бітімгерлер шетелде жүрсе де ұлттық дәстүрлерін ұмытпай, Наурыз мерекесін ерекше форматта атап өтті. Бұл жолы көктемнің басты мейрамы Голан жотасында ұйымдастырылып, халықаралық қауымдастық өкілдерінің назарын аударды.
Бір жылдан бері БҰҰ миссиясы аясында қызмет етіп келе жатқан қазақстандық әскери контингент өз жауапкершілік аймағында бейбітшілік пен қауіпсіздікті қамтамасыз етіп келеді. Осы қызметпен қатар олар ұлттық мәдениетті насихаттауға да ерекше мән беруде.
Мерекелік шара барысында бітімгерлер Наурыздың мәні мен мазмұнын таныстырып, қазақ халқының салт-дәстүрлерін көрсетті. Қонақтарға бұл мерекенің жаңару, бірлік және жаңа бастамалардың символы екені түсіндірілді.
Іс-шараға түрлі елдердің бітімгерлері мен халықаралық ұйым өкілдері қатысты. Атап айтқанда, Непал, Үндістан, Уругвай елдерінің әскери қызметшілері, сондай-ақ БҰҰ миссиясының штаб офицерлері мен бақылаушылары шақырылды.
Қонақтар үшін ұлттық тағамдар ұсынылып, мерекелік бағдарлама ұйымдастырылды. Бұл өз кезегінде түрлі мәдениеттердің жақындасуына және өзара түсіністіктің артуына ықпал етті.
Мұндай бастамалар Қазақстан әскери қызметшілерінің тек қауіпсіздікті қамтамасыз етумен ғана шектелмей, бейбітшілік, құрмет және мәдени әртүрлілікті қолдау қағидаттарына берік екенін көрсетеді.
Голан жотасында өткен Наурыз мерекесі қазақ мәдениетінің шекарадан тыс жерлерде де кеңінен насихатталып, халықаралық деңгейде өзара достық пен ынтымақтастықты нығайтуға үлес қосып отырғанын айқындады.
