Қазақстандық бітімгерлердің екінші контингенті Сирияға барады

 Бұған көп адам мысал ретінде еліміздің ядролық қарудан өз еркімен бас тартқанын айтады. Әлем елдері Қазақстанды өңірдегі бейбітшілікке үлес қосқан мемлекет ретінде қарайды деп бағалауға негіз бар.

2024 жылы Қазақстан әскерилері Біріккен ұлттар ұйымының бітімгершілік миссиясына алғаш рет дербес қатысу мүмкіндігіне ие болған. Былтыр қаңтарда парламенттің қос палатасы ел президентінің Қазақстан Республикасы қарулы күштерінің бітімгершілік контингентін БҰҰ миссияларына жіберу туралы мақұлдап, наурыз айында Голан жоталарына Қазақстаннан 139 әскери қызметшіміз аттанған.

Қазақстан әскерилері мұндай маңызды міндетті бірінші рет арқалап отырған жоқ, олар БҰҰ-ның бітімгершілік операцияларына 20 жылдан бері қатысып келеді. Бірақ былтырдан бері БҰҰ бітімгерлік миссиясы аясында алғаш рет жеке мандатпен жұмыс істеп жатыр. Бұл Қазақстан əскерилері бітімгершілік операцияларға өз еліміздің көк туы астында қатысады дегенді білдіреді.

2024 жылы наурыз айында Қазақстанның тұңғыш тəуелсіз бітімгершілік контингенті Голан үстіртіне аттанған. Ондағы қазақстандық әскери қызметкерлердің жалпы саны – 139 адам. Оның ішінде 4 әйел қызметші бар. Сондай-ақ қазақстандық әскерилер өздерімен бірге 26 әскери техниканы Голан жоталарына алып барды.

Отандық БАҚ-та жарияланған ақпаратқа сүйенсек, 2024 жылғы 15 наурыздан бері қазақстандық әскерилер БҰҰ-ның ажыратуды бақылау күштерінің құрамында жұмыс істеген. Қазақстандық бітімгерлер өздеріне берілген мандат бойынша әрекет етіп, бір жылда 557 нақты тапсырма орындаған көрінеді.

Атап айтқанда, 66 мәрте әскери персонал мен гуманитарлық жүктерді алып жүріп, 3 рет бітімгершілік базалар мен бақылау бекеттерінің күзетін күшейтуге қатысқан. 15 мәрте жарылғыш заттарды залалсыздандырып, жойған. Осы операциялар барысында 240 жарылғыш зат пен снарядтың көзін жойған. Біздің әскерилер өздеріне жүктелген жауапкершілік аймағындағы бітімгерлік базалардан әскери персоналды эвакуациялауға 4 рет қатысқаны хабарланды. Сондай-ақ 458 рет жауапкершілік аймағында мобильді патруль жүргізіпті.

Бір сөзбен айтқанда, Қазақстанның тұңғыш тəуелсіз бітімгершілік контингенті өз міндетін аса сәтті орындады деп бағалауға болады. Бірақ еліміздің БҰҰ аясындағы жұмысы мұнымен тоқтап қалмайды. Биыл сәуірде екінші бітімгершілік контингенті Сирия-Израиль шекарасына аттанады.

Екінші кезекті бітімгершілік миссиясына аттанатын әскерилер қазір Алматы облысындағы «Бітімгер» оқу-жаттығу орталығында арнайы дайындықтан өтіп жатыр. Іріктеуден биыл да 139 сарбаз өтті. Олар Голан жоталарындағы әріптестерін алмастырады. 139 адам 2 бортпен 11 және 18 сәуірде Алматы қаласынан Сирияға аттанады.

Өз туымыз астында небәрі екінші рет болғанымен, Қазақстан əскери қызметшілерінің БҰҰ-ның бітімгершілік миссияларына қатысудан тəжірибесі мол. Нақтырақ айтқанда, кейінгі 20 жылда 600-ден аса қазақстандық əскери қызметкер Біріккен ұлттар ұйымының бейбітшілік пен қауіпсіздікті қолдау жөніндегі халықаралық міндеттемесіне атсалысып, жұмыстары жақсы бағаланған.

Еламан Өмірхан