КХДР басшысы дрондарды жаппай шығаруға бұйрық берді

 Бұл туралы Кореяның Орталық телеграф агенттігі хабарлады.

«Ким сериялық өндірісті тезірек бастау және ауқымды өндіріске көшу қажеттігін атап өтті», - делінген хабарламада.

Солтүстік Корея басшысы бүкіл әлемде әскери пилотсыз ұшақтарды қолданудағы бәсекелестік күшейіп жатқанын айтқан.

«Мұндай объективті өзгерістер көптеген әскери теория, тәжірибе және білім беру бөлімдерін дереу жаңартуды талап етеді», - деп келтіреді агенттік Ким Чен Ынның сөзін.

Reuters агенттігінің хабарлауынша, КХДР Оңтүстік Корея аумағына, атап айтқанда Сеул мен президент Юн Сок Ёл кеңсесінің үстіне пилотсыз ұшақтарын ұшырған. Сондықтан Оңтүстік Корея пилотсыз ұшақтарды атып түсіру үшін әуе қорғаныс жүйелерін дайындауға мәжбүр болған.

Еске салайық, 2024 жылдың басында Солтүстік Корея ядролық оқтұмсықпен жабдықталатын Хэиль-5-23 су астындағы пилотсыз қару жүйесін сынақтан өткізіп жатқанын хабарлаған болатын. КХДР Қорғаныс министрлігі бұл АҚШ, Жапония және Оңтүстік Кореяның Жапон теңізінде өткізген үш күндік әскери жаттығуларына жауап деп мәлімдеді.

Хэиль-5-23 жүйесінің бар екенін әзірге растау мүмкін емес. Пхеньянның хабарлауынша, су астындағы пилотсыз ұшақ алғаш рет өткен жылдың наурыз айында сынақтан өткен және жау кемелері мен маңызды порттарға тосын шабуыл жасауға қабілетті.