Қырғызстан билігі кафе мен мейрамханалардан 22:00-ден кейін жарықты сөндіруді талап етті

Ресми себеп – «Тыныштық туралы» заңның орындалуын қамтамасыз ету және электр энергиясын үнемдеу.

Оштағы шектеулер: компьютерлік клубтар да жабылуы тиіс

Ош қаласының мэрі Женишбек Токторбаев кафе мен мейрамханаларға ғана емес, компьютерлік клубтар мен «антикино» форматындағы орындарға да осы талапты қойды. Талап орындалмаса, қала басшылығы нысандарды жарықтан және сумен жабдықтан толық ажырататынын ескертті.

Бішкекте – тойханаларға дейін рейд жасаған

Бішкекте полиция қызметкерлері мен муниципалдық инспекция өкілдері тіпті мейрамханалардағы отбасылық жиындарға да барып, шараларды тоқтатуды талап еткен. Бұл жағдай қоғамда кең талқыланып жатыр.

Ташиевтің мәлімдемесінен кейін басталған тексерулер

Рейдтер әлеуметтік желілерде Қырғызстан ҰҚМК төрағасы Камчыбек Ташиевтің сұхбатынан кейін басталған. Ол өз сөзінде:

• «Тыныштық туралы» заңды қатаң сақтау қажет екенін,
• Барлық көңіл көтеру орындары 22:00-ге дейін міндетті түрде жабылуға тиіс екенін,
• Талапты орындамаған жағдайда жергілікті әкімшіліктердің басшыларын жауапқа тартатынын

мәлімдеген.

Энергетика саласындағы жағдай

Электр энергиясының үзілуі халықтың наразылығын күшейтті. Бұған дейін бірнеше шектеу енгізілген еді:

• мектептер жарықты 19:00-де,
• мемлекеттік мекемелер 18:00-де сөндіруге міндеттелген;
• түнгі уақытта парктер мен жаяу жүргіншілер жолдарында жарық өшіріледі.

Энергетика министрі қазіргі жағдайды энергетикалық дағдарыс деп атаудан бас тартып, үйлердегі жарықтың сөнуін «реттеу шаралары» деп сипаттады.