Қырғызстан: Қазақстандық кәсіпкер Жұмабеков қылмыстық топты қаржыландырды

Тергеу материалдарына сүйенсек, Жұмабеков пен Асанбек бірнеше рет жеке кездесулер өткізген. Бұл кездесулердің бірі Ыстықкөл жағалауындағы элиталық «Барс» демалыс орнында өткен. Сонымен қатар Жұмабеков Кольбаевтың отбасы мүшелеріне тұрақты түрде материалдық көмек көрсетіп отырған. Өз кезегінде, бұл қолдау арқылы ол Қырғызстан аумағында өзінің коммерциялық қызметін қылмыстық топтың қамқорлығымен жүргізуге мүмкіндік алғаны айтылуда.

Қырғыз билігінің мәлімдеуінше, Жұмабековтің бұл әрекеттері елдегі қылмыстық құрылымдардың күшеюіне, көлеңкелі экономиканың кеңеюіне және заң үстемдігінің әлсіреуіне ықпал еткен.

Осы деректердің негізінде Бішкектің Октябрь аудандық соты Ерқанат Жұмабековті сырттай қамауға алу туралы шешім шығарды. Қазіргі уақытта ол Қырғызстанның құқық қорғау органдары тарапынан халықаралық іздеуде. Іздеу жұмыстары Interpol арналары арқылы да жүргізіліп жатыр.

Камчыбек Кольбаев деген кім?

Камчыбек Асанбек (Кольбаев) – Қырғызстанда және Орталық Азияда атышулы қылмыстық топ жетекшісі. АҚШ Қаржы министрлігі оны «трансұлттық қылмыстық ұйымның басты тұлғасы» ретінде сипаттап, санкциялар тізіміне енгізген. Кольбаев 2023 жылы арнайы операция барысында Қырғызстанда қаза тапқан. Алайда оның ықпалы мен байланыстары әлі күнге дейін тергеу нысанында қаралып жатыр.

Қырғызстан президенті Садыр Жапаров 2024 жылдың қаңтарында Камчы Кольбаевтың ел мүддесі үшін көзі жойылғанын мәлімдеген еді. Оның айтуынша, бұл шешім Қырғызстандағы тұрақтылық пен тәртіпті сақтау мақсатында қабылданған.