Жазылу
Қырғызстанда кәмелетке толмаған Айсулуу Мукашеваны өлтірген күдікті бірнеше зорлау мен кісі өлтіру істеріне қатысы бар болуы мүмкін
Қырғызстанның Ыстықкөл облысында 17 жастағы Айсулуу Мукашеваны өлтірді деген күдікпен ұсталған ер адамға жыныстық зорлық және кісі өлтірумен байланысты жеті қылмысқа қатысы бар деген жаңа айып тағылды.
Бұл туралы мемлекеттік «ЭлТР» телеарнасы құқық қорғау органдарымен бірлесіп жүргізген журналистік тергеуде хабарлады.
Жеті қылмыстың төртеуі – өліммен аяқталған
Тергеу деректеріне сүйенген телеарна журналистерінің хабарлауынша, күдіктінің қатысы бар істердің ішінде:
-
төрт қыз зорланып, көз жұмған,
-
екі адам тірі қалған,
-
бір қыздың тағдыры әзірге белгісіз.
Бұл қылмыстардың барлығы Мукашева ісіндегі күдіктінің әрекеттерімен байланысты болуы мүмкін.
Сот жеңіл жаза беріп, қылмыскер босап шыққан
Журналистік тергеуде айтылғандай, күдікті бұрын да осы қылмыстар бойынша қамауға алынған. Алайда екінші сатыдағы сот оның ісін қайта қарап, ауыр баптарды жеңіл баптарға ауыстырған, нәтижесінде күдікті жазасын өтемей еркіндікке шыққан.
Күдікті 2014 жылғы тағы бір кісі өлтірген болуы мүмкін
ЭлТР тергеуінде күдіктінің 2014 жылы Бішкек маңындағы Байтик ауылында өлтірілген Камиля Дүйшебаева ісіне де қатысы болуы мүмкін екені айтылды. Оның сүйегі сол жылы 16 наурызда табылған болатын.
Тергеуде Ішкі істер министрлігінің мәліметтері мен жедел түсірілім кадрлары келтірілгенімен, ресми түрде милиция бұл күдіктінің өзге істерге қатысы барын растайтын хабарлама таратпаған.
Айсулуу Мукашеваның өлімі
Айсулуу Мукашева 2025 жылғы 27 қыркүйекте Ыстықкөл облысында жоғалып кеткен. Ол сол күні Қаракол қаласына құрбысына баруға шыққан.
Қырғызстан ІІМ мәліметінше, 41 жастағы ер адам Honda Stream көлігімен оны жолда көлігіне отырғызып, алып кеткен. Кейін ол қызды зорлап, өлтіріп, денесін Шу облысындағы Боом шатқалына тастап кеткен.
Күдікті бірнеше рет сотталған
Министрлік күдіктінің бұған дейін де бірнеше рет сотталғанын, қазір Жеті-Өгүз аудандық уақытша ұстау изоляторында отырғанын хабарлады.
Айсулуу Мукашева 30 қыркүйекте өз ауылында жерленді.
Оның туыстары қылмыскерге ең қатаң жаза қолдануды талап етіп жатыр. Бойжеткеннің күдіктіні жеке танымайтыны, онымен еш байланысы болмағаны да ресми түрде расталды.
