Қытай Ресейге соғыс дрондарына арналған бөлшектерді жеткізуді күшейтті

 Бұл жөнінде The Washington Post басылымы хабарлады.

Айта кетерлігі, мұндай өсім Қытайдың жалпы экспорты Ресейге 10 пайыздан астам азайған кезеңде тіркеліп отыр.

Ресей армиясы талшықты кабель арқылы басқарылатын дрондарды белсенді қолданып жатыр

Басылымның дерегінше, 2025 жылы Ресей армиясы Курск облысын азат ету операциясынан кейін дрон соғысында бастаманы өз қолына алуға жақын болды. Бұл — оптикалық талшық арқылы басқарылатын жаңа ұрыс дрондарының арқасында мүмкін болған.

Мұндай дрондарда сигнал кабель арқылы тікелей беріледі, сондықтан қарсылас радиожеліні бұғаттай алмайды және дронның бағытын бұза алмайды.

Вашингтондағы Жаңа америкалық қауіпсіздік орталығының сарапшысы Сэмюэл Бендетт атап өткендей, бұл дрондардан қорғану өте қиын, әрі олар украин әскери жабдықтарының жеткізу желілерін үзіп тастаған.

Рекордты көлемдегі оптикалық кабельдер

The Washington Post Қытайдың кеден қызметі ұсынған мәліметтерге сүйене отырып, былай деп жазады:

• 2025 жылдың мамырында Ресейге 190 400 шақырым,

• маусымда — 208 000 шақырым,

• тамызда — рекордты 524 800 шақырым оптикалық талшық экспортталған.

Atlantic Council ғылыми қызметкері Джозеф Уэбстердің айтуынша, жеткізілген партиялардың құны мен көлеміне қарап, бұл өнімнің әскери мақсатта қолданылып жатқанын анық байқауға болады.

Басылымның есебі бойынша, тамыз айындағы жеткізілімнің өзімен-ақ 26 000-нан астам дронды жабдықтауға болады.

Салыстыру үшін: Қытай Украинаға да аздаған көлемде кабель экспорттайды, бірақ тамызда ол бар болғаны 115 шақырым болған.

 Литий-ион аккумуляторлар экспорты да өсті

Жаз айларында Ресейге қытайлық литий-ион аккумуляторларының жеткізілімі де күрт артқан.

Маусым айында Қытай бұл өнімді 54 миллион доллар көлемінде экспорттаған — бұл бұрын-соңды болмаған көрсеткіш.

Джозеф Уэбстердің пікірінше, Ресейде электромобильдер мен электроника өндірісі аз, сондықтан бұл аккумуляторлар негізінен дрондарды қуаттандыруға арналған.

 Жалпы экспорт төмендеп жатыр

Қытай ресми түрде Ресейге дайын дрондар жеткізуді тоқтатқанымен, оларды құрастыруға қажетті бөлшектер экспортын жалғастырып отыр.

Вашингтондағы Стратегиялық және халықаралық зерттеулер орталығының сарапшысы Катерина Бондарь мұны Қытайдың Ресейдің әскери өнеркәсіптік кешенін жанама түрде қолдауы деп бағалайды.

Сонымен қатар, Қытайдың жалпы экспорты Ресейде азайып келеді:

• 2025 жылдың тоғыз айында — 10,6% төмендеген,

• ал қыркүйекте юань есебімен сатылымдар 21%-ға құлаған.