Қытай Украина айыптауларын жоққа шығарды

Бұл туралы ҚХР Сыртқы істер министрлігінің ресми өкілі Линь Цзянь 18 сәуір күні өткен баспасөз брифингінде мәлімдеді.

«Қытай ешқашан қақтығысушы тараптардың біріне де өлтіретін қару-жарақ жеткізген емес. Барлық қосарлы мақсаттағы тауарлар (азаматтық және әскери қолданысы бар – ред.) қатаң экспорттық бақылауға бағынады», – деді Линь Цзянь.

Украина Қытай компанияларына санкция салды

Бұған жауап ретінде Украина үш қытайлық компанияға санкция жариялады. Атап айтқанда, Киевтің мәліметінше, бұл фирмалар Ресейдің әскери-өнеркәсіптік кешенімен тығыз байланысты:

• Beijing Aviation And Aerospace Xianghui Technology Co. Ltd

• Rui Jin Machinery Co. Ltd

• Zhongfu Shenying Carbon Fiber Xining Co. Ltd

Аталған шешімді Украина президенті 18 сәуірде арнайы жарлықпен бекіткен. Құжат президенттің ресми сайтында жарияланды.

Зеленскийдің мәлімдемесі

Украина президенті Владимир Зеленскийдің айтуынша, украин барлау қызметі Қытайдың Ресейге оқ-дәрі мен артиллерия жеткізгенін растайтын дәлелдерге қол жеткізген.

«Бізде Қытайдың Ресейге порох пен артиллерия жіберіп жатқаны туралы ақпарат бар. Бұл мәліметтер Украина Қауіпсіздік қызметі мен барлау деректеріне негізделген. Келесі аптада бұл тақырыпқа оралып, егжей-тегжейін ұсынатын боламыз», – деді Зеленский журналистерге берген сұхбатында.

Президенттің сөзінше, бұған дейін Қытай төрағасы Си Цзиньпин онымен жеке әңгімесінде Ресейге қару сатпайтынын уәде еткен. Алайда қазіргі бар ақпарат бұл уәдеге күмән туғызады.

«Біз Қытай мен Ресейдің бірлесіп әскери әлеуетті арттыру бағытында жұмыс істеп жатқанын байқаймыз – бұл алаңдатарлық деректер», – деді Зеленский.

Қытай жауабы

Пекин бұған дейін де Украина тарапынан айтылған, Қытай азаматтарының Ресейдің әскери іс-қимылына тартылып жатқаны жөніндегі айыптауларды да үзілді-кесілді жоққа шығарған.