Жазылу
Қызылордада оқушы қызды сексуалды құлдықта ұстағандарға жаза тағайындалды
Қызылордада сыныптастары мен туыстары жарты жыл бойы жезөкшелікпен айналысуға мәжбүрлеп, ақшасын өздеріне алып келген оқушы қызды жыныстық қанауға қатысты қылмыстық іс бойынша сот үкім шығарды.
Тоғыз адам, оның ішінде төртеуі кәмелетке толмағандар 11-сынып оқушысын жезөкшелікке тартып, бопсалағаны үшін кінәлі деп танылды. Олар төрт жыл сегіз айдан жеті жарым жылға дейін бас бостандығынан айырылды.
Жәбірленуші мен сотталушылардың кейбірі кәмелетке толмағандар болғандықтан сот жабық есік жағдайында өтті.
Соттың хабарлауынша, сотталушылардың кінәсі мектеп оқушысының берген айғақтарымен, заттай айғақтармен, бейнежазбалармен, WhatsApp желісіндегі хат-хабарларымен, банктік анықтамалар, сараптама қорытындысымен дәлелденіп отыр.
Кәмелетке толмаған үш бала мектеп оқушысын жезөкшелікке тартты, аса ірі көлемде бопсалады, азаптады деген айыппен алты жыл сегіз айға бас бостандығынан айырылды.
Тағы бір кәмелетке толмаған бала бопсалағаны үшін кінәлі деп танылып, төрт жыл сегіз айға бас бостандығынан айырылды. Бопсалауға көмектесті деп айыпталған тағы екі сотталушы дәл осындай мерзімге сотталды.
Сот олардың үшеуін кәмелетке толмаған баланы жезөкшелікпен айналысуға тартты және бір топ адаммен бопсалады деген айыппен жеті жарым жылға бас бостандығынан айырды.
Үкім осы атышулы іс бойынша соңғы болып саналады. Бұған дейін басқа да сот процестерінде қылмысқа қатысы бар бірнеше Қызылорда тұрғыны сотталған болатын. Осылайша, 2024 жылдың қараша айында бопсалады деп айыпталған 21 жастағы жігітке қатысты алғашқы үкім шықты. Ол төрт жарым жылға бас бостандығынан айырылды.
Желтоқсан айында мектеп оқушысын жезөкшелікке азғырып, алаяқтық жасағаны үшін тағы бір ер адам алты жыл жеті айға бас бостандығынан айырылды. Сол айда кәмелетке толмаған баланы жезөкшелікпен айналысуға азғырған екі әйелге қатысты екі бөлек үкім шығарылды. Біреуі төрт жылға, екіншісі төрт жарым жылға бас бостандығынан айырылды.
Алты ай бойы сыныптастарының мәжбүрлеуімен секс құлдықта болған қызылордалық оқушы қыздың оқиғасы өткен жылдың күзінде жұртшылыққа белгілі болды. Мектеп оқушысының анасы қызының жағдайын білген соң полицияға жүгінгенін, бірақ олар баланы арнайы мектеп-интернатқа апарып, ата-ана құқығынан айырамыз деп қорқытқанын айтты. NeMolchiKZ қоры тергеу оқиғасы жария болғаннан кейін ғана алға жылжығанын мәлімдеді. Күдіктілер бұқаралық ақпарат құралдарында жарияланғанға дейін бостандықта жүрген; олар қоғамдық наразылық кезінде қамауға алынды.
