ҚМДБ сәләфиттер, уахаббиттер, тәкфиршілер және Наурыз туралы мәлімдеме жасады

«Мұсылмандардың әрекеті мен қателіктері үшін исламды кінәлауға болмайды. Себебі исламда кемшілік жоқ, кемшілік – адамның өзінде. ҚМДБ соңғы оқиғаларға байланысты алаңдаушылық білдіреді. Жекелеген адамдардың қателіктері діннің немесе ҚМДБ-ның атынан жасалмайтынын жеткізгіміз келеді. Исламда ажырасу Аллаға ұнамды іс емес, бірақ ерлі-зайыптылар арасында түсініспеушілік болса, ажырасуға рұқсат етіледі. Ажырасқан адамдардың жаңа отбасы құруы – өз еркінде. Ал шариғат бойынша арнайы ажырасып, әйелді басқа біреуге беруге жол берілмейді. Қоғамда талқыланып жатқан Құрбанәлі Ахмет есімді азамат ҚМДБ жүйесінде жұмыс істемейді, оның ҚМДБ-мен білім беру немесе өзге бағыттар бойынша ешқандай байланысы жоқ», – делінген жұма күні таратылған мәлімдемеде.

ҚМДБ өздерін Қазақстанда исламды ресми түрде насихаттайтын жалғыз орган екенін атап өтті. Сонымен қатар, ислам діні халықтың салт-дәстүрімен тығыз байланысты екенін айтты.

«Қазақ халқының ұлттық мерекесі – Наурыз. ҚМДБ Наурыз мерекесін атап өтуге рұқсат береді, себебі онда дінге қайшы келетін ешқандай элемент жоқ. Бұл мәселеге қатысты жекелеген адамдардың жағымсыз пікірлері біздің ұстанымымызды білдірмейді, біз оларды қолдамаймыз. Сәләфиттік, уахаббиттік және тәкфиршіл ағымдардың кейбір өкілдері дін атынан түрлі пікірлер айтуда. ҚМДБ мұндай деструктивті ағымдарға қарсы түсіндіру және алдын алу жұмыстарын жүргізіп, олардың ықпалына түскен азаматтарды дәстүрлі дінге қайтару бағытында жұмыс істеп жатыр», – делінген мәлімдемеде.

Еске салсақ, 1 сәуір күні Мәжіліс депутаты Ермұрат Бапи Бас прокурор Берік Асылов пен ҚМДБ-ға «псевдоимам» және «сақалы бар, бірақ мұрты жоқ, Наурыздың исламға қатысы жоқ деп мәлімдеген адамға» қатысты үндеу жасаған еді.