Қорғаныс вице-министрі сарбаздардың аналары туралы сұрақты тыңдаудан бас тартты

 Алайда шенеунік пікір білдіруден бас тартып, «отырысқа асығып бара жатқанын» айтып, жауап бермей кетіп қалған.

Журналистер Ахмедиевке аналардың министрмен кездесуін еске салған. 10 қараша күні Қорғаныс министрлігінің қоғамдық қабылдау кеңсесі алдында сарбаздары бейбіт уақытта әскери борышын өтеп жүріп қаза болған аналар мен туыстар жиналып, министр немесе оның орынбасарларының шығуын жеті сағат бойы күткен еді.

Олар армиядағы әділетсіз тергеулер мен әлімжеттік оқиғаларына қарсы наразылықтарын білдіріп, ұлдарының өлімі бойынша істердің қайта қаралуын талап еткен.

Оқиғадан кейін Президент Қасым-Жомарт Тоқаев бұл мәселені жеке бақылауына алып, Бас прокурорға 12 күн ішінде аналардың өтініштерін мұқият қарауды және тергеулердің заңдылығын тексеруді тапсырған болатын.

Бірақ қоғам өкілдері мен белсенділердің пікірінше, Қорғаныс министрлігі мен оның басшылығының үнсіздігі – биліктің азаматтық талаптарға селқос қарайтынын көрсетеді.

Айта кетейік, ресми дерекке сүйенсек, 2020 жылдан бері Қазақстан армиясында 270 әскери қызметші қаза тапқан.