Қостанай облысында өртенген үйден 15 адам эвакуацияланды

Жітіқара қаласының 11-шағын ауданында бес қабатты тұрғын үй өртке оранған. Аязды күні халық баспаналарын тастап шығуға мәжбүр болды.

— Шақыру орнына жедел жеткен өрт сөндірушілер жанып жатқан пәтерге асықты. Қатты түтінге және жоғары температураға қарамастан, өрт сөндірушілер пәтер иесін тез тауып, оны далаға шығарды. Содан кейін құтқарушылар зардап шегушіге алғашқы медициналық көмек көрсетіп, жедел жәрдем қызметіне тапсырды, — деп жазды ТЖМ баспасөз қызметінен.

Сондай-ақ ТЖМ құтқарушылары баспалдақ маршымен 15 адамды, оның ішінде 5 баланы эвакуациялады. Өрттің шығу себебі анықталып жатыр.