Қостанайда денсаулық сақтау басқармасы басшысының орынбасары қамауға алынды

Қостанай облысы бойынша ҰҚК департаменті облыстық денсаулық сақтау басқармасы басшысының орынбасары Ерболат Доспановтың ұсталғанын хабарлады. 

Ведомствоның мәліметінше, ол қызметтік өкілеттігін асыра пайдалану дерегі бойынша қозғалған қылмыстық іс шеңберінде тергеліп жатыр.

Прокуратура өзге мәліметтер ҚР ҚПК-нің 201-бабына сәйкес жария етілмейтінін атап өтті.

Бұған дейін өңірде денсаулық сақтау басқармасының бұрынғы басшысы Данияр Жандаев та ұсталған еді. Тергеу мәліметінше, ол медициналық жабдық сатып алу кезінде қызметтік өкілетін асыра пайдаланды деген күдікке ілінген. 25 тамызда оны, аудандық аурухананың бас дәрігерін және бір коммерциялық кәсіпорын директорын ҰҚК-нің сыбайлас жемқорлыққа қарсы қызметі ұстаған.