Костенко шахтасында қаза тапқандар саны 45-ке жетті

Сағат 20.00-дегі жағдай бойынша қаза тапқан 45 кеншінің мәйіті табылды, бір кеншіні іздеу жұмыстары жалғасып жатыр.

"Қаза болған шахтерлердің саны 45-ке жетті. Мұны Республикалық апаттық-құтқару жұмыстары штабы филиалы директорының орынбасары Геннадий Силинский растады", - делінген хабарламада.

Жұмыс бір-бірінен шамамен 6 км қашықтықта орналасқан екі тау-кен учаскесінде жүргізілуде.

Апаттың болжамды ошағын тексеру үшін Төтенше жағдайлар министрі Сырым Шәріпханов шахтаға түсті.

Естеріңізге сала кетейік, сенбі, 28 қазан күні Қарағанды ​​облысындағы Костенко атындағы шахтада метан газы жарылды. Қаза болған кеншілерге байланысты 29 қазан Қазақстанда жалпы ұлттық аза тұту күні деп жарияланды.