Кремль Путиннің резиденциясына «шабуыл» жасалғанына дәлел келтірмеді

 Кремльдің ресми өкілі Дмитрий Песков бұл жағдайға қатысты «мұндайда қандай да бір дәлелдің қажеті жоқ» деп мәлімдеп, шабуыл жасалды деген күдікті теракт ретінде бағалады.

Ресми нұсқалардағы қайшылық

Ресей сыртқы істер министрі Сергей Лавров Украина тарапы Путиннің Новгород облысындағы Валдай резиденциясына 91 дронмен шабуыл жасағанын айтқан. Алайда сол күнгі Ресей Қорғаныс министрлігінің хабарламасында Новгород облысы аумағында 18 дронның атып түсірілгені ғана көрсетілген.

Жергілікті тұрғындар дрондардың ұшуын да, әуе шабуылына қарсы қорғаныс жүйелерінің жұмысын да естімегенін айтады. Әлеуметтік желілер мен жергілікті пабликтерде шабуыл салдарын көрсететін фото немесе видео материалдар да жарияланбады.

Лавровтың мәлімдемесінен бір күн өтсе де, Кремль мен Ресейдің ресми құрылымдары «шабуылдың» болғанын растайтын ешқандай айғақ ұсынған жоқ. Соған қарамастан, бірқатар елдердің басшылары бұл «шабуылды» айыптаған мәлімдемелер жасады.

Біріккен Араб Әмірліктерінің Сыртқы істер министрлігі оқиғаны «жиіркенішті» деп атап, Ресей президенті мен халқына қолдау білдірді. Пәкістан премьер-министрі Шахбаз Шариф те осыған ұқсас мәлімдеме жасады.

Үндістан премьер-министрі Нарендра Моди X әлеуметтік желісіндегі парақшасында Путин резиденциясына жасалды делінген шабуыл туралы «алаңдаулы» екенін жазды. Ол дипломатиялық күш-жігерді әскери қимылдарды тоқтатып, бейбітшілікке жетудің ең дұрыс жолы деп атап, барлық тараптарды жағдайды ушықтыратын әрекеттерден бас тартуға шақырды.

Кремльдің мәліметінше, Өзбекстан президенті Шавкат Мирзиёев пен Қазақстан президенті Қасым-Жомарт Тоқаев та бұл «шабуылды» айыптаған. 30 желтоқсанда екі президент те Владимир Путинмен телефон арқылы сөйлескені хабарланды.

Дрондар санына қатысты түсініксіздік

Ресей Қорғаныс министрлігінің 29 желтоқсандағы таңғы есебінде Ресей аумағында 89 украин дроны жойылғаны, оның 18-і Новгород облысына бағытталғаны айтылды. Бір жарым сағаттан кейін ведомство бұл өңірде тағы 23 дронның атып түсірілгенін хабарлады.

Лавровтың 91 дрон туралы мәлімдемесінен кейін министрлік қосымша түсіндірме жариялап, бұл санға Брянск облысында тоқтатылған 49 дрон мен Смоленск облысы үстінде ұсталған тағы бір дрон да кіретінін айтты. Олар «Новгород облысы бағытымен ұшқан» деп түсіндірілді.

Алайда Валдай тұрғындары дрондардың ұшуы немесе олардың жойылуы кезінде ешқандай дыбыс естімегенін, шабуыл қаупі жөнінде ескерту болмағанын мәлімдеген. Бұл туралы бірнеше тұрғынмен сөйлескен «Можем объяснить» және Sota project телеграм-арналары жазды.

The Wall Street Journal басылымы соғыс зерттеу институтының сарапшысы Грейс Мэппстің сөзін келтіріп, аймақта әуе шабуылына қарсы қорғаныс жүйесінің іске қосылғанын дәлелдейтін ешбір фото немесе видео табылмағанын хабарлады.

Кремль мен Киевтің ұстанымы

Кремль бұл оқиғаны Владимир Путинге де, АҚШ президенті Дональд Трампқа да қарсы бағытталған теракт деп бағалады. Песков «Ресей әскері қалай, немен және қашан жауап беретінін біледі» деді.

Ресейдің федералдық телеарналары «шабуылға әрекет» тақырыбын кеңінен таратты. Кейбір бағдарламаларда Украина «Ресейге ресми түрде соғыс жариялады» деген пікірлер айтылып, Киевтегі үкімет ғимараттарына соққы беру туралы ашық қауіптер де айтылды.

Украина президенті Зеленский Лавровтың мәлімдемесін «Ресейдің кезекті өтірігі» деп атап, Мәскеу Киевтегі мемлекеттік нысандарға соққы жасауға алғышарт дайындап жатыр деп мәлімдеді.

Украина сыртқы істер министрі Андрей Сибига бір күн өтсе де Ресей өз айыптауларына ешқандай дәлел келтірмегенін айтты.

«Олар дәлел ұсына алмайды. Өйткені ондай дәлел жоқ. Ешқандай шабуыл болмаған», – деп жазды Сибига.

Ол сондай-ақ БАӘ, Үндістан және Пәкістанның мәлімдемелеріне қынжылыс білдіріп, бұл елдер 2025 жылғы 7 қыркүйекте Ресейдің нақты зымыраны Украина үкіметінің нақты ғимаратына тигенде ешқандай ресми реакция танытпағанын еске салды.