Литва Беларусьпен жабылған шекараны жақын күндері қайта ашуы мүмкін

Шекараны ашу мәселесі талқыланып жатыр

18 қарашада DW басылымына берген сұхбатында Литва сыртқы істер министрі Кястутис Будрис Беларусьпен шекара жақын күндері қайта ашылуы мүмкін екенін айтты. Оның сөзінше, соңғы апталарда Беларусь тарапынан жіберілетін метеозондтардың саны азайған, ал Литва қазір өз әуе кеңістігіндегі жағдайды бағалап жатыр.

«Иә, біз бұл мәселені талқылап жатырмыз. Толық жабылған шекара мен екіжақты қозғалысты тоқтату сияқты қатаң шараны қайта қарастыруымыз мүмкін», – деді министр.

Бірақ ол шекара ашылған күннің өзінде Минскіге қатысты басқа санкциялық немесе шектеу шаралары автоматты түрде жойылмайтынын ескертті.

Әуе қауіпсіздігіне қатер төнсе, шектеулер қайта енгізіледі

Будристің айтуынша, егер Беларусьтен ұшатын метеозондтар Литваның азаматтық авиациясына тағы қауіп төндірсе, Вильнюс қайтадан өз құқығындағы ұлттық құралдарды қолданады. Сол сияқты, министр Беларуське ықпал етудің ең тиімді жолы ретінде Еуропалық одақ деңгейіндегі санкцияларды күшейтуді атады.

Оның пікірінше, ЕО санкцияларын қолдану критерийлерін кеңейту керек. Қазір ол Беларусьтегі адам құқықтарын бұзу және Минскідің Ресейге Украинаға қарсы соғыста көмектесуі үшін енгізілген. Министр гибридтік шабуылдар (мысалы, метеозондтар) үшін де қосымша санкциялар қажет екенін айтты.

Жаңа санкциялар қандай салаларды қамтуы мүмкін?

Будрис ЕО-ның санкциялық тізіміне енгізілуі мүмкін салалар қатарында:

• тыңайтқыштар өндірісі, әсіресе азотты тыңайтқыштар;

• азаматтық авиация саласы;

• бухгалтерлік есеп, аудит және заң қызметтері сияқты бизнес-секторлар.

Министр Минск тарапынан жаңа қысым құралдары пайда болуы мүмкін екенін, сондықтан алдын ала кең ауқымды тізім дайындалғанын жеткізді.

Литва ТІМ қазан айының соңында Беларусьпен шекараның уақытша жабылғанын ресми жариялап, Минскіге «ұлттық әуе кеңістігін жүйелі түрде бұзғаны үшін» нота жолдаған. Литва шекара қызметінің дерегінше, 2025 жылдың басынан бері Беларусьтен жіберілген жүздеген метеозонд тіркелген. Олар контрабандашылар темекі өнімдерін заңсыз тасымалдауға пайдаланатын құрал ретінде белгілі.

Күз айларында мұндай шарлар Вильнюс пен Каунас халықаралық әуежайларына тым жақындап, бірнеше рет әуе қатынасына шектеулер енгізілген.

Польша да шекара өткелдерін қайта ашты

Осы арада, 17 қарашада Польша да бірнеше жыл жабық тұрған Беларусьпен шекарадағы екі бақылау-өткізу бекетін қайта ашты.