Львовта Жоғарғы Рада экс-спикері Андрей Парубийді өлтіріп кетті

Полицияның дерегінше, қылмыскер курьер кейпінде келіп, саясаткерге бірнеше рет оқ атқан. Оқиға Сыхов ауданында болған. 54 жастағы Парубий оқиға орнында көз жұмды. Киллер электросамокатпен  қашып кеткен. Қазір оны іздестіру жұмыстары жүріп жатыр.

Қалада арнайы жоспар – «Сирена» жарияланып, күдіктіні ұстау шаралары күшейтілді. Бейнебақылау камералары қастандық сәтін жазып алған. Алайда қылмыскер әлі қолға түскен жоқ.

Украина президенті Владимир Зеленский, Ішкі істер министрлігі және Бас прокуратура оқиғаны растады. Тергеу органдары қылмысты мұқият жоспарланған деп сипаттап отыр.

Андрей Парубий Евромайдан кезінде өзін-өзі қорғау жасағының жетекшісі ретінде танылды. 2014 жылы Қауіпсіздік және қорғаныс кеңесінің хатшысы, 2016–2019 жылдары Жоғарғы Рада спикері қызметін атқарды. Соңғы жылдары «Еуропалық ынтымақтастық» партиясының депутаты болды.

Ол Кремльде «идеологиялық қарсылас» ретінде қабылданған саясаткерлердің бірі еді. Парубий Ресей басшылығының Украинаға қатысты пиғылын ашық сынап келген.

«Путиннің мақсаты бір: Молдова, Беларусь және Грузияны толық бақылауға алу. Бірақ, менің ойымша, ең алдымен ол Украинаны өз қолына түсіруге тырысады. Оның бойында Кеңес Одағы дәуірінде болған Кремльдің геосаяси билігін қайта қалпына келтіру жөнінде маниакалды идея бар. Алайда олар Украинасыз империяның болашағы жоқ екенін жақсы түсінеді. Сондықтан ол үшін басты мәселе — Украинаны талқандау, осы елді бақылауға алу», — деген еді саясаткер.

Қастандықтың нақты себептері әзірге белгісіз. Тергеу саяси тапсырыс болуы мүмкін деген нұсқаны да қарастырылып жатыр.