Мақсат – халықаралық деңгейде бақылаушы дайындау

Еліміздегі қорғаныс саласын халықаралық деңгейге көтеру мәселесі күн тәртібінен түскен емес. Әскеріміздің әлеуетін көтеру әркез маңызды. Озық елдермен иық тірестіру еліміздің қарулы күштеріне үлкен серпіліс береді, сенімділік ұялатады. Сондықтан Қазақстанның қорғаныс саласының мамандары көптеген халықаралық тәжірибелерден қағыс қалмауда. Әскердің әлеуетін арттыруда көптеген халықаралық жиындар мен келісімдерді үздіксіз жүргізуде.

Сондай мақсатта жақында еліміздің Қорғаныс министрлігінің Бітімгерлік операциялар орталығында БҰҰ әскери бақылаушыларын даярлау жөніндегі пилоттық курс жұмысын бастады.

Бұрындары әскери қызметшілерді тек қана БҰҰ-ның бітімгерлік операцияларына әскери бақылаушы ретінде қатысуға даярлауды шетелде шетелдік мамандар жүргізіп келген. Енді сондай курсты жүргізу үшін қазақстандық әскери нұсқаушылар құрамы әзірлеген курстың үш апталық бағдарламасы Бітімгерлік операциялар орталығының базасында бағалаудан өтуі тиіс.

«Алдағы уақытта біз курсты бағалау үшін БҰҰ-ның сарапшыларын шақыруды жоспарлап отырмыз, егер бағдарлама мақұлданып, курс аккредиттеуден өтер болса, бұл бізге Бітімгерлік операциялар орталығының базасында халықаралық деңгейдегі сертификатталған әскери бақылаушыларды даярлауға мүмкіндік береді.

Аталған курс бағдарламасы офицерлердің әскери бақылаушы ретінде бітімгерлік міндеттерін сәтті орындауға дайындығын қамтамасыз ететін пәндердің тұтас кешенін қарастырады», – дейді орталықтың оқытушысы, майор Айбар Ақтөреев.

Бұндай тәжірибелік сабақтардың арқасында әскери қызметшілер әр жердің географиялық жер рельефтері мен ауа райы жағдайларында жол талғамайтын ауыр техникалық көліктерді жүргізіп, қолдан жасалған жарылғыш құрылғыларды табу мен жаралыларды мина алаңынан оқшаулау міндеттерін пысықтап, әскери тактикаларға машықтануы керек.

Сондай-ақ болашақ әскери бақылаушылар медициналық дайындық, қолайсыз климаттық жағдайлардан аман қалу бойынша практикалық сабақтардан өтіп, шабуыл, торуыл, кепілге алу кезіндегі іс-қимыл алгоритмін пысықтайды.

Жанна Ақбергенқызы