Маңғыстауда балық шаруашылығын дамытудың арнайы бағдарламасы әзірленеді

 Қазақстандағы балық шаруашылығын дамытуға не көмектесетінін ірі балық шаруашылығының басшылары тәжірибе алмасу бойынша өткен бірінші өңіраралық кеңесте талқылады.  Іс-шара Маңғыстау облысы әкімдігінің бастамасымен 20 желтоқсан күні Ақтау қаласында өтті.

 Жиынға Экология министрлігі Балық шаруашылығы комитетінің акваөсіруді дамыту басқармасының басшысы Мирас Ғаббасов, Атырау, Қарағанды, Түркістан, Алматы, Маңғыстау облыстарының кәсіпкерлері, аудан әкімдері, мемлекеттік органдардың басшылары қатысты.

 Шараға қатысушылар балық шаруашылығының экономикадағы маңызды салалардың бірі болып табылатынын, экономикалық өсім мен халықты жұмыспен қамтудың негізі екенін атап өтті.  Мамандардың айтуынша, балық шаруашылығын одан әрі дамыту үшін үлкен мүмкіндіктер бар.  Десе де, бұл процеске кедергі келтіріп отырған бірқатар мәселелер бар дейді балық шаруашылығы саласының мамандары. 

 Өңір кәсіпкерлері балық сақтайтын арнайы мұздатқыш қоймалардың жоқтығын, сондай-ақ білікті мамандардың тапшылығын атап өтті.

 – Кадр жетіспеушілігінен бөлек, елімізде өндірілетін балық жемінің жағдайын да талқылауымыз керек.  Өкінішке орай, сапасы төмен болғандықтан, біз жем-шөпті шетелден сатып алуға мәжбүрміз, бұл түпкілікті өнімнің өзіндік құнына әсер етеді, — дейді кәсіпкер Тұрсынгүл Жақыпова.

 Экология министрлігі балық шаруашылығы комитетінің акваөсіруді дамыту басқармасының басшысы Мирас Ғаббасовтың айтуынша, қазіргі балық шаруашылығын дамыту бағдарламасы елімізде балық өндіру мен тұтынуды арттыруға тиіс.

 -Балық шаруашылығын жүргізу үшін келесімшартты жасау мерзімі 49 жылға өзгертілді, осылайша бизнеске ұзақ мерзімді жоспарларды іске асыруға мүмкіндік жасалмақ, – деді. Оның айтуынша, осыған дейін келісімшарттар мерзімі 5 жылдан 49 жылға дейінгі аралықта болған.

 Аймақ басшысы Нұрлан Ноғаев өңіраралық тәжірибе алмасуда әр өңірдің ерекшелігін ескеру керектігін атап өтті.  Талқылау барысында сарапшылар бүкіл ел бойынша балық шаруашылығын дамытуға мүмкіндік беретін ортақ шешімге келе алуы керек.

 – Мемлекет басшысы Қасым-Жомарт Тоқаев 2022 жылғы қарашада Маңғыстау облысының тұрғындарымен кездесуінде өңірдегі балық шаруашылығының әлеуеті жоғары екенін атап өтті.  Өткен жылдың сәуір айында үкімет балық шаруашылығын дамыту бағдарламасын қабылдап, облыста 2030 жылға дейін өсірілетін балық көлемін 100 мың тоннаға арттыру жоспарлануда.  Қажетті құзыреттері, білімі, балық аулау, өсіру және қайта өңдеу бойынша тәжірибесі бар шаруашылық жүргізу субъектілермен байланыс және тәжірибе алмасу балық өнеркәсібінің дамуына оң әсер етуі тиіс.  Кездесудің  нәтижесі болуы да керек, – деді Нұрлан Ноғаев.

 Отырыс нәтижесінде жиналғандар бірқатар ұсыныстарды ортаға салды.  Енді Маңғыстауда балық шаруашылығын дамытудың арнайы бағдарламасы әзірленбек.

 Айта кетейік, бүгінде Маңғыстауда 2030 жылға дейін балық өсіру көлемін ұлғайту үшін 218 миллиард теңгенің сегіз жобасын жүзеге асыру жоспарланған.