Жазылу
Мемлекет салық төлемегендердің тізімін жариялай бастайды
Қаржы министрлігі салықтан жалтарған тұлғалардың тізімін жариялауды бастайды. Қаржы вице-министрі Ержан Біржановтың айтуынша, жаңа Салық кодексіне сәйкес, бұл ақпарат салықтық құпия болып саналмайды.
«Салық кодексіне сәйкес, салықтық берешек салықтық құпия болып саналмайды. Біз салық төлемеген борышкерлердің тізімін жариялаймыз», – деді Ержан Біржанов Салық кодексі жобасының таныстырылымында.
Бұл тек ашықтықты қамтамасыз ету емес, сонымен қатар берешектерді өндіріп алу жүйесіне де реформа енгізу мақсатын көздейді. Бұрын 100 теңге қарыз үшін де банк шоттары бұғатталуы мүмкін болса, енді бұл тәсіл өзгеріп отыр.
Жаңа ережелерге сәйкес:
-
20 АЕК-ке дейін (шамамен 80 мың теңге) – салық төлеушіге өсімпұлымен бірге ескерту жолданады;
-
20-дан 45 АЕК-ке дейін (шамамен 180 мың теңгеге дейін) – салық органдары банкке инкассо бұйрығын жібереді;
-
45 АЕК-тен жоғары – мүлікті түгендеу және сату шаралары қолданылуы мүмкін.
«Санкциялар салық қарызының мөлшеріне байланысты қолданылатын болады. Енді аз сома үшін банк шоттары бұғатталмайды», – деді вице-министр.
