Жазылу
Тоқаев Құрлық әскерлерінің жаңа бас қолбасшысын тағайындады
Мемлекет басшысының Жарлығымен ҚР Қарулы Күштері Құрлық әскерлерінің және «Оңтүстік» өңірлік қолбасшылығы әскерлерінің қобасшылары тағайындалды.
Бұл туралы Ақорда хабарлады.
Мемлекет басшысының өкімдерімен Мереке Көшекбаев Қазақстан Республикасының Қарулы Күштері Құрлық әскерлерінің бас қолбасшысы лауазымына тағайындалды. Ал «Оңтүстік» өңірлік қолбасшылығы әскерлерінің қолбасшысы лауазымына Ержан Ыбыраев тағайындалды.
Мереке Көшекбаев 1976 жылы 7 тамызда Батыс Қазақстан облысында дүниеге келген.1997 жылы Алматы жоғары құрама қару-жарақ командалық училищесін, 2007 жылы Ұлттық қорғаныс университетін бітірген.
2013-2017 жылдары - «Оңтүстік» өңірлік қолбасшылығы дирекциясы жауынгерлік даярлық бөлімінің бастығы.
2017-2020 жылдары - Қазақстан Республикасы Қарулы Күштері Аэро-шабуылдаушы күштері Бас штабының бастығы – бірінші орынбасары.
2020-2021 жылдары – «Астана» өңірлік қолбасшылығы әскерлерінің қолбасшысы.
2021-2022 жылдары - Қазақстан Республикасы Қарулы Күштері Құрлық әскерлері Аэро-шабуылдаушы әскерлерінің қолбасшысы.
2022 жылдың наурыз айынан бастап «Оңтүстік» өңірлік қолбасшылығы әскерлерінің қолбасшысы.
2023 жылғы қарашада Қазақстан Республикасы Қарулы Күштері Бас штабының бастығы – Құрлық әскерлері бас қолбасшысының бірінші орынбасары болып тағайындалған.
Ал «Оңтүстік» өңірлік қолбасшылығы әскерлерінің қолбасшысы лауазымына тағайындалған Ержан Ыбыраев 1978 жылы 1 қыркүйекте Семей қаласында дүниеге келген. Алматы жоғары әскери училищесін «Командалық-тактикалық мотоатқыштар әскерлері» мамандығы бойынша бітірген. Ұлттық қорғаныс университеті, «жедел-тактикалық басқару (менеджмент)» мамандығы бойынша да білім алған.
1995 жылдан 2017 жылға дейін взвод командирінен бастап әскерлер қолбасшысының орынбасарына дейін әртүрлі лауазымдарда қызмет еткен.
2023 жылғы 7 қарашада Мемлекет басшысының өкімімен «Астана» өңірлік қолбасшылығы әскерлерінің қолбасшысы болып тағайындалған.
Айта кетейік, Қазақстан Республикасының Қарулы Күштері Құрлық әскерлерінің бас қолбасшысы Асан Жүсіпов лауазымынан босатылды. Сол сияқты «Оңтүстік» өңірлік қолбасшылығы әскерлерінің қолбасшысы қызметін атқарған Қуанышбек Үштаев та лауазымынан босатылды.
