Мүйізден шыққан қылмыс

Дәл осы маусымда жабайы аңшылардың араны асқынып кетеді. Жуырда, яғни 4-қарашада Алматы облысының Полиция департаментінің ҰҚҚКБ қызметкерлері үш ер адамды ұстады.

Күдіктілер 1989, 1990 және 1997 жылғы жігіттер екен. Олардан 100 келіден артық ақбөкеннің мүйізі табылыпты. Ведомство өкілдерінің айтуынша, жедел ұстау кезінде құрықталғандардан 953 тал, салмағы 100 келіден асатын ақбөкеннің мүйізі тәркіленген. Құрықталған азаматтарға қатысты ҚК-нің 339-бабы бойынша қылмыстық іс қозғалып, тергеу жұмыстары басталған.

Ақбөкен мүйізінің емдік қасиетіне бола жабайы аңшылар жылда осы маусымда дала тағысын жаппай қырып, мүйіздерін қырқып алып кететін жаман әдеттері бар. Алайда жыл сайын олар құрықталып, сотталып жатады. Алматы облысындағы бұл жағдай заңсыз аңшылықпен күрес негізінде ұсталып отыр.