Жазылу
NASA астронавттарды Айға ұшыруға дайындалып жатыр
NASA соңғы 50 жылдан астам уақыттан кейін алғаш рет астронавттар қатысатын Айды айналып ұшу миссиясына дайындықты бастады. Ұшырылым алдағы үш апта ішінде жүзеге асуы мүмкін.
Бұл туралы NBC News хабарлады.
NASA биіктігі 98 метр болатын Space Launch System (SLS) зымыранын «Орион» капсуласымен бірге Флорида штатындағы Кеннеди ғарыш орталығы ұшыру алаңына жеткізді. Бұл төрт астронавтты Ай орбитасына жөнелту алдындағы жүйелерді кешенді тексерудің негізгі кезеңі.
Ұлттық аэронавтика және ғарыш кеңістігін зерттеу басқармасы «Артемида-II» миссиясына дайындық аясында бірқатар сынақтарды өткізуді жоспарлап отыр. Егер барлық тексеріс сәтті өтсе, агенттік ұшырылымның нақты күнін жариялауы мүмкін. Алдын ала болжам бойынша, миссия 6-11 ақпан аралығында ұшырылуы ықтимал. Сонымен қатар наурыз және сәуір айлары да балама мерзім ретінде қарастырылып жатыр.
Миссия жоспарына сәйкес, экипаж құрамына NASA астронавттары Рид Уайзман, Виктор Гловер, Кристина Кох және канадалық астронавт Джереми Хансен кіреді. Олар ғарышта 10 күн болып, әуелі Жерді айналып ұшып, кейін Ай орбитасына шығады.
«Артемида-II» миссиясы Space Launch System зымыраны мен «Орион» ғарыш кемесі үшін ең маңызды сынақ болмақ. Бұл ұшудың сәтті өтуі 2027 жылға жоспарланған «Артемида-III» миссиясына жол ашады. Аталған миссия аясында астронавттар Айдың оңтүстік полюсіне жақын аумаққа қонуы тиіс.
Айға қайта оралу бастамасы АҚШ-тың бұрынғы президенті Дональд Трамп үшін де басым бағыттардың бірі болған. Бұл шешім АҚШ пен Қытай арасындағы жаңа ғарыштық бәсекенің күшеюімен байланыстырылады. Қытай билігі өз астронавттарын 2030 жылға дейін Айға қондыруды жоспарлап отырғанын мәлімдеген.
