«НеМолчи» қоғамдық қорының негізін қалаушы Дина Смайылова Черногориядан саяси баспана алды

Бұл туралы «Азаматтық альянс» халықаралық ұйымы мәлімдеді. Ұйымның хабарлауынша, ерлі-зайыпты жұп оларға екі жыл бұрын жүгініп, қорғау сұраған.

«Осылайша, ұзаққа созылған әрі күрделі құқықтық процедура аяқталды. Енді Дина Смайылова мен Алмат Мұхамеджанов өз өмірлерін қауіпсіз елде – Черногорияда жалғастыра алады», - делінген ұйым таратқан хабарламада.

Смайылова Қазақстанда гендерлік зорлық-зомбылықпен күресіп, көптеген қоғамдастықтарда резонанс тудырған істерді жария түрде қорғаған белсенді ретінде танымал. Алайда кейінгі жылдары оның үстінен бірқатар қылмыстық іс қозғалып, билікпен қақтығысқа түсті.

Белсендінің үстінен «заңсыз ақша жинау», «қор қаражатын мақсатсыз пайдалану» секілді айыптар тағылып, 2023 жылы Қазақстан тарапынан халықаралық іздеу жарияланған. 2024 жылғы сәуірде Дина Смайылова Черногорияда Интерпол желісі бойынша ұсталған еді. Алайда маусым айында Черногория Жоғарғы соты оны Қазақстанға экстрадициялаудан бас тарту туралы шешім шығарды. Сот шешімінде қайтарылған жағдайда Смайыловаға әділетсіз сот және адам құқықтарының бұзылуы қаупі бар екені ескерілген.

Осыдан кейін белсенді мен оның жұбайына Черногория билігі саяси баспана берді.