Нығматулиннің ұлына қатысты рейдерлік әрекет бойынша қылмыстық іс қозғалды

 Бұл тергеу белгілі бизнесмен Қанат Амиркиннің шағымы негізінде қозғалды. Амиркиннің айтуынша, оның "Алатаудорстрой" компаниясы Нұрлан Нығматулиннің үлкен ұлы – Нұржан Нұрланов тарапынан рейдерлік жолмен тартып алынған және одан ірі көлемде ақша бопсаланған.

Амиркин бұл әрекеттерді "қарапайым өз бетінше билік ету" деп емес, болашақта "рейдерлік" және "алаяқтық" баптарымен қайта саралануы мүмкін деп есептейді. Ол сондай-ақ компанияға қатысты қайта тіркеу, сондай-ақ ВОАД бойындағы жер телімінің заңсыз иеліктен шығарылуы бойынша тергеу кеңейтілуі мүмкін екенін мәлімдеді.

Нұржан Нұрланов — бұрын "ҚазМұнайГаз-Аэро" компаниясының бас директоры, сондай-ақ "Бәйтерек" ұлттық холдингінің басқарма мүшесі болған. Бұл лауазымдар оның квазимемлекеттік сектордағы ықпалын айқындайды.

Нұрлан Нығматулиннің өзі 2016–2022 жылдар аралығында Мәжіліс спикері қызметін атқарды, оған дейін Президент әкімшілігін, Қарағанды облысын басқарды. Оның егіз бауыры Ерлан Нигматулин де Парламенттің қос палатасында депутат болған. Ал үлкен ағасы Арғын Нигматулин – Қарағанды облыстық мәслихатының экс-депутаты.

Бұл отбасына бұрыннан рейдерлік шабуылдар, бизнес құрылымдарды күшпен тартып алу, заңсыз байыту және қылмыстық топтармен байланысты деген айыптар тағылып келген. Алайда бүгінге дейін бұл айыптар заңдық тұрғыда дәлелденбей келген еді. Бұл туралы бірнеше бизнесмен де иәлімдеген болатын. Jas Alash Нығматулиндердің рейдерлік ісі бойынша бірнеше рет жазды. 

Айта кетейік, 2025 жылы наурызда Арғын Нығматулинге қатысты қылмыстық іс қозғалып, ол сыбайлас жемқорлыққа қарсы қызметтің желісі бойынша іздеуге жарияланды. Бас прокуратура оның мемлекеттік қаржыны жымқыру дерегі бойынша айыпталып жатқанын растады. Артынша Арғын Нигматулинге халықаралық іздеу жарияланып, 12 жылға дейін бас бостандығынан айырылуы мүмкін екені белгілі болды. Алайда ол елден алдын ала шығып кеткен.