Жазылу
Норвегияда АҚШ дипломатиялық миссиясы жанындағы жарылысқа күдіктілер ұсталды
Норвегия полициясы Ослодағы АҚШ елшілігінің кіреберісінде болған жарылысқа қатысы бар деген күдікпен үш адамды ұстағанын мәлімдеді.
Күдіктілер — Норвегия азаматтары, тегі ирактық үш ағайынды. Олардың жасы 20 мен 29 аралығында. Бұған дейін олар полицияға белгілі болмаған.
Тергеу деректеріне сәйкес, күдіктілер 8 наурызға қараған түні АҚШ елшілігінің консулдық бөлімінің кіреберісінде жарылғыш құрылғыны іске қосқан. Тергеушілердің айтуынша, күдіктілердің мақсаты адамдарды өлтіру немесе елеулі материалдық зиян келтіру болуы мүмкін.
Бұл туралы тергеуді басқарып отырған Кристиан Хатло мәлімдеді.
Шетелдік мемлекеттің қатысы болуы мүмкін
Полиция бірнеше нұсқаны қарастырып жатқанын айтты. Соның бірі — шабуыл шетелдік мемлекеттік құрылымның тапсырмасымен жасалған болуы мүмкін деген болжам.
Тергеушілердің айтуынша, алдағы уақытта тағы да тұтқындаулар болуы ықтимал.
Норвегия полициясы бұл іс бойынша АҚШ-тың Федералдық тергеу бюросымен (FBI), Интерполмен және басқа да халықаралық құрылымдармен бірлесіп жұмыс істеп жатыр. Бұл туралы Норвегияның NRK медиакомпаниясы хабарлады.
Жарылыс қалай болды
АҚШ елшілігінің консулдық бөлімінің кіреберісінде жарылыс 8 наурызға қараған түні болған. Оқиға салдарынан ешкім зардап шеккен жоқ.
Полиция жарылыстың нақты себебі туралы толық ақпарат бермеді, тек жарылғыш құрылғы қолданылғанын растады.
AFP агенттігінің хабарлауынша, жарылыс болған жерде консулдық бөлімінің кіреберісіндегі қар үстінде әйнек сынықтары жатқан. Қалың әйнек есікте жарықтар пайда болған, шамдар сымдарынан салбырап тұрған. Ал есіктің түбіндегі жерден жарылыстың қара іздері байқалған.
