Оңтүстік Африкаға қар жауды

Шілде айы оңтүстік жарты шарда қыс, бірақ мұнда 10 жыл бойы қар жаумаған.

Үкімет тұрғындарға жылы киінуге кеңес берді, өйткені суық фронт елдің көп бөлігін басып алды және кем дегенде бір апта сақталуы болжанған.

«Әзірге қардың жаууы айтарлықтай қиындықтар туғызбайды», — деді Оңтүстік Африканың метеорологиялық қызметі (Saws) BBC тілшісіне берген сұхбатында.

Йоханнесбургтің оңтүстігіндегі Броккенхерсттегі қар басқан алқаптар. Фото: Reuters

Йоханнесбург тұрғындарын қар басқан көшелер қызықтырады, бұл өз аймағында сирек кездесетін құбылыс.

«Мен және кейбір оқушылар қармен жақыннан танысуға шықтық… олардың кейбіреулері қардың не екенін біледі, ал басқалары бұл жай ғана жаңбырдың түрі деп ойлайды», — дейді бастауыш сынып мұғалімі Агнес Мидева.

Үй қызметкері Нобухоси Стомпи BBC-ге жолды қар басып тұрғандықтан жұмысқа шықпағанын және мұндай көріністі бұрын-соңды көрмегенін айтты.

«Біздің үй жылы, сондықтан бәрі тәртіппен. Барлық жерде қар жауып жатыр, облыстың айналасындағы егістіктерді басып қалды», — дейді супервайзер Билли Нксумало.

Көптеген мектеп оқушысы қарды бірінші рет көріп отыр. Фото: EPA

Оңтүстік Африканың бірқатар провинцияларында, соның ішінде Шығыс Кейпте, Мпумалангада және Йоханнесбург пен Соуэто қалаларын қамтитын Гаутенг аймағында қар жауды.

Метеорологтар шаруаларға осындай суық ауа райында малдарына қолайлы жылы қора табуға кеңес берді.

Шенеуніктер шаруаларға малды жылы жаққа көшіруді ескертеді. Фото: AFP

Әзірге бұл ерекше салқын ауа райы мен қардың жаууы климаттың өзгеруінің салдары ма, нақты айту қиын.